Nalimmassaanissaq pillugu apeqqutit arfinillit
Nalimmassaaneq qanoq atorneqarpa?
Kommunit tamarmik karsimut ataatsimoorussamut akiliuteqartarput. Allatut oqaatigalugu, akileraarutitigut isertitaqarnerpaat karsimut tassunga akiliuteqarnerpaasarput. Tamatumalu kingorna, aningaasat kommuninut tamanut agguarneqartarput, kommunit sunik aningaasartuuteqarnerat apeqqutaatinneqartarluni.
Agguaariaatsit suut atorlugit aningaasat agguaanneqartarpat?
Agguaariaatsit pingasuupput.
1. Innuttaasut ukiuisa agguataarsimanerat tunngavigalugu. Tassa, inuusuttut utoqqaallu qanoq amerlatiginersut apeqqutaatillugu aningaasanik pissarsisoqartarpoq.
2. Nunaqarfiit amerlassusaat tunngavigalugu. Nunaqarfiit 100-t ataallugit innuttaasoqartut nunaqarfiillu 100-t 300-llu akornanni innuttaasoqartut immikkoortinneqartarput.
3. Innarluutilinnik sullissinermut aningaasartuutit. Tamanna kommunit suliaqarfimmut pineqartumut ataatsimoortumik tapiissutitigut pisartagaat tunngavigalugit naatsorsorneqartarpoq.
Nalimmassaanissamut ilusiliani assigiinngitsuni agguaariaatsit taakku pingasut assigiinngitsutigut uuttuutigineqarlutik atorneqartarput.
AAMMA ATUARUK Kommunit aningaasaqarnerannik naligiissaarineq paasiuminarsarlugu
Pissutsit allat, soorlu inuusuttut ajornartorsiutillit, pissakinnerusut imaluunniit suliffissaaleqisut ilusiliani uuttuutigineqarneq-ajorpat?
Tamakkorpiaat kommuninut qanoq naleqartiginersut kisitsisaatigineqanngilaq. Kisitsisillu taakku aappaaguutinnagu pissarsiarineqartussaassaapput. Taamaaliortoqareerpallu pissutsit tamakkua nalimmassaanissamut ilusiliami inaarutaasumi 2016-imoortumi ilaatinneqarnissaat siunertaavoq.
Ilusiliani assigiinngitsuni kisitsisit taama nikerartiginerannut suna pissutaava?
Tamatumunnga pissutaasoq annerpaaq tassaavoq, kommunit ilusiliani assigiinngitsuni akiliutigisassaasa assigiinngitsupilussuunerat. Ilusiliami Qaasuitsup, Qeqqata aamma Kommune Kujalliup atorunnerpaasaanni, karsimut ataatsimoorussamut 1,7 mia. kr.-it pallillugit akiliuteqartoqartussaavoq. Ilusiliarlu taanna atorneqassappat, Kommuneqarfik Sermersooq ullumikkumut naleqqiullugu 117 mio. kr.-inik ikinnerusunik tunineqartussanngussaaq. Ilusiliami Vittus Qujaukitsup siunnersuutigisaani 750 mio. kr.-it missaat pineqarput. Kommuneqarfik Sermersoorlu naapertorlugu 500 mio. kr.-it missaanniittariaqaraluarput.
Karsimut ataatsimoorussamut akiliutit qanoq naatsorsorneqartarpat?
Pissutsit tunngavigineqartut marluupput.
1. Ilaatigut akileraarutitigut isertitat, Namminersorlutik Oqartussani naalagaaffimmilu atorfilinneersut. Aningaasat taakku tamaasa karsimut ataatsimoorussamut akiliutigineqassapput. Kommuneqarfik Sermersuulli tamanna tunngaviatigut isumaqatiginngilaa; tamatumali pivusunngortinneqarnissaa ilimanartupilussuuvoq.
2. Akileraarutitigut isertitat allat pingaarnertut tassaapput akileraarutit a-t innuttaasut sinnerineersut. Ilusilianilu assigiinngitsuni isertitat taakku 6 procentiinit 20-iinut pineqarput. Tamannarpiarlu assigiinngissutsinut qulaani taakkartorneqartunut pissutaavoq.
Ilusiliaq sorleq naapertuilluarnerpaava?
Tamanna arlaanniilluunniit akineqarsinnaagunanngilaq. Qulaani oqaatigineqareersutut, kommunit aningaasaqarnerannut sunniutaasorpassuit pillugit paasissutissat amigaatigaagut. Taamaammat Namminersorlutik Oqartussani atorfillit akileraarutigisaasa ilanngunneqarnissaat ilumut naapertuilluarnerunersoq imaluunniit naapertuilluannginnersoq oqaatigineqarsinnaanngilaq. Aningaasammi taakku kingornatigut qanoq agguarneqassanersut apeqqutaalluinnassaaq. Tamannalu naalakkersuinikkut aalajangiiffigineqartussaavoq. Tamannalumi Naalakkersuisut ullumi aalajangiiffigisussanngorpaat.
