Naliliisartut: Atassut qinersinermi ajorsarpoq
Qinersinermi kisitsisit takkussortut aallaavigalugit Atassut ajorsartussatut isikkoqarpoq. Atassut qinersinermi 7,7 procentinit qinerneqarpoq, tamanna kingullermik qinersinermut sanilliullugu 8,6 procentimik kinguariarneruvoq.
Allattoq Louise M. Kleemann
Atassut makeqqeriassaguni imminut piumaffigisariaqartoq qinersinermi naliliisartut Henrik Skydsbjerg aamma Jakob Janussen KNR-TV-mut oqarput.
Siulittaasulerngusaannerup ullormi qinersiffimmi tamanut saqqummiunneqarnera partiimut iluaqutaanngitsoq qinersinerup takutikkaa, Jakob Janussen isumaqarpoq.
- Kina partiimi siulittaasuussanersoq apeqqutaanngilaq, apeqqutaasorli tassaavoq partii imminut makiteriarnissaminut nukissaqassanersoq, Henrik Skydsbjerg oqarpoq.