Naliliisartup Air Greenland ingasattumik nersorpaa
Tamannalu aviisiliortup naammagisimaarluarpaa.
- Angalaninni SAS-ip timmisartorsuinut ilaallunga ungasissunut, soorlu New Yorkimut aamma Bangkokimut angalasarnerpassuannut, eqqaanartumik misigisaqarpunga, aviisiliortoq Lea Pagh aviisimi Politikenimi ippassaq taama allappoq.
- Sullissinerat ajunngilluinnarpoq, nerisavut mamaqaat sullissisullu utaqqinaratik, Lea Pagh allappoq. Aamma timmisartuutileqatigiiffiup atuagassiaa Suluk allalluagaagami aliikkutaalluartoq oqaatigaa aamma nalunaaquttap akunnialunnguini kalaallit kulturiannik pinngortitarsuarmillu annerusumik paasisaqarfiusinnaalluni.
Aviisiliortoq ilanngullugu isumaqarpoq, akikinnermiilluni aatsaat taama inissaqartigisumik Norsami naammattoorsilluni.
Allaammi nerisassat iggisissallu aviisiliortup isornartoqartinngilai.
Taamaattorli omeleti Danmarkimit Nunatsinnukarnermini nerisani "kummitut tasisuaarnerarpaa". Angerlamulli aqqutaani "timmisartumi aatsaat taama mamartigisumik lasagne-mik nerisimalluni" unnersiorpoq.
"Angalanermi misigisaq nunanut tamalaanut nallersuussinnaasoq" aviisiliortup allaaserisani taama qulequtsersimavaa.
