Naliliisartunik pilersitsisoqassanngilaq
Biilit qanoq naleqartiginerinik naliliilluarsinnaasunik immikut pilersitsisoqassanngitsoq, Naalakkersuisut aalajangerput.
Biilit nunatsinnut eqqussuunneqartarnerini peqquserluttoqartarsimanissaanut atatillugu, Demokratineersup Lene Knüppel-ip apeqquteqaataanut Naalakkersuisut taama akissuteqarput.
Biilit akitsuutaannik peqquserluttoqartarsimanersoq paasiniarlugu, maannakkorpiaq politiit misissuileruttorput. Ilaatigut akileraartutinik akiliinikinnerunissaq anguniarlugu, biilinik pisinermut uppernarsaatinik peqquserluttoqartarsimanersoq politiit misissorpaat. Naalakkersuisullu isumaqarput biilit naliinik imikkut ittumik ilisimasallit pisariaqanngitsut.
Bilit atornikut qanorpiaq naleqarnersut nalilersoruminaatsinneqartarput, taamaammallu biilinik atornikunik pisisuusimasut biilit nalivii salluliutigalugit peqquserluutiginiartarsimagaat ilimagineqarluni.
Danmarkimi biilinik atornikunik naliliisartunik peqarpoq, Nunatsinnilu Naalakkersuisut taamaattunik pilersiterusunngillat, isumaqaramik nunatsinni biilit ikippallaartut.
