Naliliisartoq: Siulittaasumut unammillerneq Siumup iluaqutiginavianngilaa
Inatsisartunut qinersineq sioqqullugu naalakkersuisut siulittaasuannut Hans Enoksen-imut Aleqa Hammondip unammillernera partiip Siumup iluani isumaqatigiinngittoqarneranik takussutissaavoq, taamatut oqarpoq Jakob Janussen KNR-ip qinersinermut naliliisartua.
Allattoq Jaaku Lyberth
"Isumaqarpunga takkorliunnerusoq Partiip iluani annertuumik isumaqatigiinnginneqartoq, oqartoqaraluarpoq partiip Siumup iluani avissaartuuttoqanngitsoq immaqami avissaartuuttoqanngilaq kisianni taamatut qinersineq sioqqullugu partiip siulittaasuanut unammillernermik saqqummerneq allatut nalilersinnaanngilara partiip iluani annertuumik isumaqatiginnginneqartoq", KNR-ip qinersinermut naliliisartua Jakob Janussen oqarpoq. Qinersineq sioqqullugulu assigiinngitsunik isumaqarluni saqqummerneq partiimut iluaqutaanissaa Jakob Janussenip qularivaa oqarluni partiip Siumup siuariaatiginavianngikkaa.