Naliliisartoq: Naalakkersuisut allaanerussusermik takutitsinngillat

- Siunnersuutit ataasiakkaat, siammasissutut isigisariaqartut, Naalakkersuisut inuiaqatigiinnik qanoq ittunik siunissami pilersitsiniarnerannik takutitsisutut oqaatigineqarsinnaanngillat, Jakob Janussen naliliivoq.

Inatsisartut upernaakkut ataatsimiinnerat apriilip qulingiluaani aallartissaq, maajillu 19-iata tungaanut oqaluuserisassat maannakkut 102-jugallartut suliarissallugit. Naalakkersuisunit inatsisissatut siunnersuutit, nassuiaatit aalajangiffigisassatullu siunnersuutit tamakkununnga ilaapput.

Jakob Janussenip maluginiarpaa, siunnersuutit siammaseqisut. Assersuutigalugu oqaatsinut politikkissaq pillugu inatsisissatut siunersuuteqarpoq. Aamma meeqqat atuarfianni atuartunut annernut tapiissutit atorunnaarsinnissaannik siunnersuuteqarpoq. Aamma pujortartarnermut inerteqqutissamik siunnersuuteqarluni.

Kisianni tassa Naalakkersuisut Inatsisartut upernaakkut ataatsimiinnissaanni oqaluuseritikkumasaat imminnut ataqatigiinngitsut Jakob Janussen isumaqarpoq.

Tamaammallu Jakob Janussen isumaqarpoq, inuiaqatigiit qanoq ittut Naalakkersuisut pilersikkusunneraat takuneqarsinnaanngitsoq.

Kisianni Jakob Janussen isumaqarpoq, tamanna pissuteqartoq, suli marlunnik ataatsimiititaliarsuaqarmat, suliaminnik suli naammassinninngitsunik aammalu aalisarneq pillugu inatsisissaq naammassinngimmat.

- Kisianni imaassinnaavoq, aningaasaqarneq pillugu politikkimik nalunaarusiaq, naalakkersuisut sunik aningaasanik nalilinnik ingerlatsinissaannik tikkuussisartoq, saqqummerpat tamakku tikinneqarsinnaajumartut.

Juunilli aqqaneq aappaani 2009-mi Naalakkersuisoqatigiilersut pitsaaqutaannik Jakob Janussen maanna takusaqarsinnaalereerpoq.

- Ukiorpaalussuanngortuni oqaaseq tusaajuartarparput, aningaasartuuteqarneq sukannersumik aquttariaqartoq, tamannali ilaatigut timitaleruminaatsinneqartarluni. Kisianni meeqqat atuartut anginerit tapiiffigineqartarunnaarnissaannik siunnersuut aammalu kommuninut tapiissutissat ikinnerulersinnissaannik siunnersuut maanna eqqaaneqarsinnaapput. Ilaatigut tamakkunatigut saqqummeriartorpoq, Naalakkersuisut oqaasiinnaaq timitalerniarmassuk, Jakob Janussen oqarpoq.