Naliliisartoq: Illuatungiliuttut illuatungiliuttuunertik sungiukkuminaatsippaat

- Pissusiviusut tunngavigalugit oqalunneq pingaartorujussuuvoq, imatut oqarluartaarneq piinnarnagu, Naalakkersuisut illuatungiuliuttulluunniit Inatsisartut ataatsimeereernerisa kingorna nukittunerunerusutut nalilerneqarsinnaanersut Jakob Janussen aperigatsigu oqarpoq.

Taamaattoq naalakkersuisut politikkiat suunersoq aamma nalileruminaatsippaa

- Naalakkersuisut qanorpiaq isumaqarnerat suli erseqqissumik paasiuminaappoq. Naalakkersuisummi pilersinneqarmata isumalioqatigiissitanik arlalinnik pilersitaqarput, taakkulu qanoq nalunaaruteqarnissaat utaqqineqarluni. Taamaattumik Naalakkersuisut siunissami qanoq iliuuseqarniarnersut nalileruminaapput, Jakob Janussen oqarpoq.

Jakob Janussenilu naapertorlugu illuatungiliuttut illuatungiliuttuunertik sungiukkuminaatsippaat:

- Isumaqarpunga illuatungiliuttut ukiorparujussuarni naalakkersuinermik, pissaanermik, tigumminnissimallutik massakkut inissisimanertik assut sungiukkuminaatsikkaat. Soorluuna paasisimanngikkaat massakkut naalakkersuinermik, pissaanermik tigumminnikkunnaarsimallutik, Jakob Janussen naliliivoq.

Siumup siulittaasuata Aleqa Hammondip partiimik aqutsinera aamma apeqquserneqarpoq:

- Saqqumeqqaarmat isumaqaraluarpunga partiimi katersuuffiusinnaasutut inississasoq, kisianni partiimi ilaasortat ataasiakkaat ilaat sumut tamaanga assigiinngitsunik oqariartaaseqarput. Soorluluunniit aqussinnaanngikkai, Jakob Janussen oqarpoq.

Aappaagumut aningaasanut inatsisissaq Atassutip akuersaarpaa. Taamatut akuersaarnera Jakob Janeussenip aamma tupiginngilaa:

- Atassut partiitut immikkut isummersinnaasutut isigineqassaguni Siumumit kalinneqarluni ingerlanissaa killeqalersimannguatsiarpoq. Taavalu Atassut isummersimannguatsiarluni: Allatut ajornaqaaq, massakkut uagut nalunaartariaqalerpugut Siumumit kalitaaginnartutut pinnata immikkuulersugut, taavalu aamma akisussaasusermik tigusisinnaanngortugut, naalakkersuineq pillugu ilinniarsimasoq inuiaqatigiinnilu pissutsinik naliliisartoq Jakob Janussen oqarpoq.