Naliliisartoq: IAp Siumullu inissat avikkumaarpaat
Qinersisartunik isumasiuisartoq, Henrik Skydsbjerg aviisimut oqarpoq, nammineq naliliinini naapertorlugu IA aamma Siumut tamarmik ilaasortaatitaqaleqqinnissaat ilimagalugu. Aamma Savalimmiuni politikkimik ilisimasalik Sveinur Trondarson oqarpoq massakkut qinersisoqaraluarpat ilaasortat Savalimmiuneersut allannguuteqarnavianngitsut, tassa Sambandspartii aamma Republikanerit ataatsimik ilaasortaatitaqaannassasut.
Maanna piffissami sivitsortumi Folketingimut qinersisoqaleraluttuartoq tusatsiarneqartarpoq. Maannali naalakkersuinermik malinnaasut oqaatigaat, ministeriunerup Lars Løkke Rasmussenip qinersisitsinissaq aasami sulinngiffeqarnerup kingorna nalunaarutigissagaa. Kingusinnerpaamik novembarimi qinersisoqartussaavoq.
Juliane Henningsen aamma Lars-Emil Johansen tamarmik qinigassanngorteqqinnianngillat.