Naliliinerit assigiinngillat

Assartuussineq pillugu isumalioqatigiissitap inassutaanut Demokratit nuannaarput, IA-mi akunnatuungapput - ilaat pitsaapput ilaat pitsaanngillat. Siumullu tupaallaatigaa, tupaallannartortaqanngimmat.

Inatsisartuni partiit allaffiini naliliineq ullumi taamaappoq. Inatsisartut allannguinissanut ataatsimoorsinnaanerannik naliliinerit assigiinngillat.
- Nutaarsiassat ikittuarakasiupput. Inuiaqatigiinni oqallisigineqareertut saqqummiinermi piffissarujussuaq atorlugu saqqummiunneqarput.
- Apeqqutit, Ilulissani Mittarfiup allineqartariaqarneranut, timmisartoqarfiup Narsarsuarmiit Qaqortumut nuuttariaqarneranut aammalu Nuummi mittarfiup allisariaqarneranut tunngasut, qangali oqallisigineqartareersut, qaqippai, Siumup siulittaasua, Aleqa Hammond, naliliivoq.
Ataatsimulli isigalugu aaqqiisinnaanerit assigiinngitsut innuttaasunut sunniutigisinnaasai pinnagit aningaasaqarneq qitiutillugu isumalioqatigiisitaq sulisimammat naammaginngilaa.
- Innersuussutit Nunatta Karsiani sipaarutaasinnaasunik aallaaveqarput, Aleqa Hammond oqarpoq.
Tamannarpiarli isumalioqatigiititap aallaavigisimammagu, Demokratit oqaaseqartartuata, Justus Hansenip, nuannaarutigeqaa.
- Aningaasaqarneq qissingaarneqarsimammat immikkut nuannaarutigaara,  tassa assigiinngitsut imminut akilersinnaanersut. Uagummi politikkeraarput, ajornanngiffiini imminut akilersinnaasumik ingerlatsissasugut. Massakkut ilungersunartorsioratta, aningaasat naggaterpiaatigut qissimigaartariaqarpagut. Assartuussineq pillugu isumalioqatigiissitap takutippaa, ingerlatani imminut akilersinaanngitsuni aningaasartuutikillisaasariaqartugut, Justus Hansen oqarpoq.
IA-p angallannermut ataatsimiititaliami ilaasortaatitaata aappaa ima oqarpoq.
- Soorunami nuannaajallaateqarlungalu kisianni aamma nuannaanngissuteqalaarpunga,  Olga P. Berthelsen oqarpoq,  
Taassuma assersuutigalugit Kangerlussuup Narsarsuullu timmisartoqarfiinik matusinissamik inassutit, akueriuminaatsutut taavai.
Naalakkersuisut tungaannit isumaqatigiinnissaq qitiuvoq. Jens B. Frederiksenip oqaatigaa, partiit tamarmik peqataaffigisaannik inuiaqatigiit naapeqatigiinnissuteqarnissaat anguniaritsik.
Tamannali piviusorsiornersoq, parteeqataanut, Justus Hansenimut apeqqutigaarput:
- Eqqarsaqqaalaarpunga. Kisianni aap. Tamakkerluta isumaqatigiilluinnartariaqarpugut, Justus Hansen oqarpoq.
Olga P. Berthelsenilli Inatsisartut tamarmiullutik taama allannguitigisumik aalajangiinissamut piareersimasut qularaa.
- Isumaliutissiissutip misigissutsit qaffatsissappagit tupigivallaassanngilara. Ukua sumiiffiit ataasiakkaanut tunngassuteqartorujussuummata, misigissutsinik eqquissappata tupinnarpallaanngilaq.
Kisianni tassami oqarneratut, oqaluuserisassat imaannaanngitsut IA-mut, Siumumut, Demokratinut, Atassummut Kattusseqatigiit Partiiannullu tunnganngillat.
- Nalunngittariaqarparput, aalajangigassavut imaannaanngitsut ukiuni tulliuttuni aalajangiiffigisariaqarivut, Nunatta siunissaa eqqarsaatigalugu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat