Naliliineq: Tatisiniarneq iluaqutaasimarpasippoq
Arfanniarnermut Ataatsimiititaliarsuarmi qallunaat arfanniarnermut kommissæriata allagai naapertorlugit nunat ilaasortaasut arlaqartut isumaqatigiinniarusussuseqarput. Taamaattumik Danmark IWC-mit ukiortaami aninani septemberimi isumaqatiginninniarnissaq peqataaffiginiarniarpaa.
- Allakkat atuarnerani paasisoraara pinngitsaaliiniarnertut Danmarkip Kalaallit Nunaannut IWC-mullu aallartissimasai arlaannik aallartitsisimasoq.
Ulrik Pram Gad oqarpoq. Issittoq Naalagaaffeqatigiinnerlu pillugit ilisimatusarsimavoq. Arfanniarnermummi ataatsimiititaliarsuup naammagisinnaanngimmagu nunat arfanniartartut ilaasortaarusukkunnaarnissaat.
Kattuffiup soqutigisaraa nunat arfanniartartut peqataatinnissaat. Taamaaliunngikkunimmi kattuffittut tatiginartutut isigineqalersinnaagami.
Isumaqatigiinnginnermut peqqutaarpiarput siunnersuutinut assortuutinngitsumik kalaallit pisassatik tikaagulliusaanik qulingiluanik, qipoqqarmillu ataatsimik ilarusummatigit.
Assut uissuummissangaluarpunga kalaallit piumasatik tamaaasa pissappatigit. Aallarniutaasinnaavormi nammineq malittarisassaliorluni ingerlasoqalersinnaammat, tamannalu kattuffimmut taamaattumut pitsaasuunngilaq. Imaassinnaavorli pisassanik qaffaanissamut tunngavililersuutinik sanasoqarsinnaasoq.