Naliliineq: Naalakkersuisut marloqiammik eqqarsaatissinneqarput
- Danmarkip naalakkersuisuisa nunat allamiunut inatsit allanngortissagunikku amerlanerussuteqartariaqassapput. Amerlanerussuteqarniarunillu partiit talerperliit, soorlu Venstre, De Konservative aamma Liberal Alliance kisimik isumalluutigilerpaat, Henning Olsson oqarpoq, Kalaallit Nunaannilu inatsisissaq Folketingimi taama assortuussutaatiginera takornarnerarlugu.
- Tamanna naliginnaanngitsuuvoq qaqutigoorlunilu. Ilami aatsaavissuaq taamaattoqarnera takornarpara, Henning Olsson oqarpoq, nunat allamiunullu Danmarkip inatsisaata allanngortinneqarnissaa taasissutigineqarpat akuerineqarnissaa qularnarutiginerarlugu.
Una suliaq Danmarkip iluani politikkianut taputartuunneqaleriaannaavoq. Partiimmi talerperliit piumagunik maanna naalakkersuisut ikinnerussuteqalerseriaannaavaat. Tamannali piviusunngussanersoq suli nalunarpoq, tassami suli naaggaavissorsimanngimmata. Partiilli Enhedslisten aamma Dansk Folkeparti malartitassaajunnaareerlutik naaggaareerput.
Aamma nunat allamiunut inatsimmut allannguutissap taasissutigineqarnissaa Danmarkimi naalakkersuisut februarip tungaanut kinguartissinnaalluaraat Henning Olsson-ip ilimanarnerarpaa, Nunatsinnilu suliniutit angisuut pillugit inatsisissaq atuutsinneqalissappat Danmarkip nunat allamiut pillugit inatsisaa allanngorneqaqqaartariaqarmat qaqilerneqaqqippat oqallisaaqqileriaannaanerarlugu.
- Tusarniaavigineqartussammi tassaapput Danmarkimi inuutissarsiuteqartut kattuffii, taakkulu akerliunissaat qularinngerluinnarpara, Henning Olsson oqarpoq.
