Naliliineq: Krimimi ilungersunartorsiorneq Issittumut sunniuteqarsinnaavoq
Danmarkip Radioani tusagassiortoq, issittumi pissutsinik immikkut ilisimasalik, taama isumaqarpoq.
Politikenimi ullumi saqqummersumi naliliilluni oqaatigaa Krimimi ilungersunartorsiorneq Issittumi nunat arlallit siunissamut ernumassuteqalernerinik kinguneqartoq.
Naliliisartoq Canadamiu Robert Murray ilaatigut ima issuarpaa:
- Issittumi naalagaaffiit arlallit Ruslandip Ukrainemut iliuusaanik akerlilersuiinnanngillaat; Ruslandilli pissusilersornera pilertortumillu iliuuseqarsimanera aamma sakkortuumik isornartorsiorpaat, tamatumalu malitsigisaanik aamma Ruslandimut killilersuinissamik allatigullu pillaanissamik maanna sulissuteqarlutik. Amerikamiut Europap kangiani politikkikkut pissutsinut akuliunnerisigut Issittoq pillugu suleqatigiinnermut sunniuteqanngitsoornavianngilaq.
Martin Breum naapertorlugu Issittumi sakkulesorluni akerliittoqalernissaa takorloorneqanngilaq, uuliakoortoqassagaluarpalli SAR-imillu upalungaarsimaniarnermut tunngatillugu suleqatigiinneq sanngiinnerulissasorivaa.
Amerikamiut Kolap qeqertaasaani atomip nukinganik sakkussianik nakkutilliinissaat tamaasa taamaatiinnarniarlugit Ruslandip maanna isumaliutigaa, USA-llu Barentip imartaani Norge Ruslandilu peqatigalugit sakkutuut imarsiortut sungiusarnissaannut peqataaniarunnaarluni nalunaarsimalluni.
