Múte B. Egedep nunanut allanut naalakkersuisumi akisussaaffii annikilligunigit imaluunnit naalakkersuinit anisikkuniuk, tamanna Inuit Ataqatigiit ikinnerussuteqalerneranik kinguneqarsinnaavoq.Assi: Ólafur Steinar Rye Gestsson/Ritzau Scanpix

Naliliineq: Brobergip pititsinerani ima pisoqarsinnaavoq

Múte B. Egede Brobergip pititsinerani kukkulluni alloriarpat Naalakkersuisut imaaliallannerinnarmi ajalusoorsinnaapput.

Naalakkersuisut siulittaasuata massakkut ilungersuutigisaa tassaavoq Naalakkersuisut ataannarnissaannik sulissuteqarnini.

Taama radioaviisimi aaqqissuisoq, Jens Thorin, isumaqarpoq.

AAMMA ATUARUK Atassut: Nu skal Múte lave en rokade i Naalakkersuisut

Ikinnerussuteqalersinnaavoq

Naalakkersuisummi katitigaanerat, Inatsisartuni ilaasortamik ataatsimik amerlanerussuteqartitsinermik tunuliaqutaqartoq, qaammatit arfiniliinnaat pioreerluni Múte B. Egede Brobergip pititsinerani kukkulluni alloriarpat imaaliallannerinnarmi ajalusoorsinnaavoq.

Múte B. Egedemmi nunanut allanut naalakkersuisumi akisussaaffii annikilligunigit, imaluunnit naalakkersuinit anisikkuniuk, Inuit Ataqatigiit ikinnerussuteqalernerannik tamanna kinguneqarsinnaavoq.

- Assigiinngitsunik pisoqarsinnaavoq. Apeqqutaalluinnassaaq Naalakkersuisut siulittaasuat qanoq aalajangernersoq, Jens Thorin, Pele Brobergip pititsineranut Múte B. Egede qanoq iliuuseqarniarluni aalajangernersoq pilllugu ataasinngornermiilli tusarsiisoq, taama oqarpoq.

Inuit Ataqatigiit politikkikkut siulittaasuata tullia, Aqqaluaq B. Egede, Sermitsiaq.AG-mut sapaammi oqarpoq Naalakkersuisuni nikittoqarnissaa ilimanarsinnaasoq.

AAMMA ATUARUK Múte B. Egede Pele Brobergip oqaasiinut naqqiuteqartoq

Aamma partii Naalakkersuisunut tapersersortaasoq, Atassut, ataasinngornermi nalunaaruteqarpoq Múte B. Egede erngerluni nikisitsisariaqartoq.

- Ilorrisimaanngitsorujussuuvugut, Pele Broberg tunuliaqutakkalu tapersersorsinnaanngilarput. Nunanut allanut tunngasunut naalakkersuisoqarfimmik isumaginninnissamut piukkunnanngilaq, Atassutip siulittaasua Aqqalu Jerimiassen oqarpoq.

Utaqqisitsivoq

Partiip illuatungiliuttup, Demokraatit, Pele Brobergip Berlingskemi issuarneqarluni oqaasii aamma ajorluinnarnerarpaat.

Naalakkersuisoqatigiit

Inatsiartuni qinigaaffiit 31-upput. 

Inuit Ataqatigiit aqqaneq-marlunnik qinigaatitaqarput. 

Naleraq sisamanik qinigaatitaqarpoq. 

Partiit marluk taamaalillutik ataatsimik amerlanerussuteqarput. 

Partii ikorfartortaasoq Atassut Inatsisartunut marluinnarnik qinigaatitaqarpoq.

- Ajorluinnaqqinnaarpoq innuttaasut inunnit kingoqqisut kisimik Kalaallit Nunaata namminiilivinissaa pillugu innuttaasunik taasisitsisoqalissangaluarpat kisimik taasitinneqarunik.

Naalakkersuisut siulittaasuat maanna kisimi aalajangertussanngorpoq Pele Brobergip Berlingskemut oqaaseqarsimanera pillugu qanoq kinguneqartitsiniarnerluni.

- Taassuma aalajangernissaa suli utaqqivarput. Aviisimi Berlingskemi allaaserisaq sapaatip akunnerata kingulliulli naanerani saqqummerpoq. Sulilu aalajangertoqanngilaq, Jens Thorin oqarpoq.

- Nalorninartorsiornerlu paasinarluinnaqqissaarpoq. Tassami naalakkersuisooqatigiit massakkut ataasiinnarmik amerlanerussuteqarput. Amerlanerussuteqaqataasullu tassaapput Naleraq. Tassanilu ilaasortaavoq Pele Broberg.

- Taamaattumik Pele Brobergimut tunngasumik Naalakkersuisut siulittaasuat aalajangiissaguni naalakkersuisooqatigisani Naleraq oqaloqatigeqqaartariaqarpaa. Taannalu isumaqatigiissuteqarfigisariaqarpaa qanoq pisoqarnissaanik, Jens Thorin oqarpoq.

AAMMA ATUARUK Politikkimut malinnaasoq: Naalakkersuisuni sakkortuumik toqqissiviilliortoqarpoq

Sisamanilli inuttaqarlutik naalakkersuisooqateqartut nikisitsisoqaratarsinnaanera akuerissaneraat nalunarpoq.

- Tassa taanna pissanganartoq. Nalunngilarput Naleraq, naalakkersuisooqataasoq, qineqqusaarnermi oqareertoq Naalakkersuisooqataalissagunik piumasatik pinngikkunikkit tunuariaannaallutik. Aamma Naalakkersuisuniit siusinnerusukkut maanaannaq tunuarnikuupput, Jens Thorin oqarpoq.

- Taamaattumik Naalakkersuisuuffik, Naalakkersuisuni taama pingaaruteqartigisoq, tigummiartik annaassagunikku qanoq qisuariarnissaat pissanganartorujussuuvoq.

Mianersorpoq

Angullu, naggaterpiaani aalajangiisussaq, Pele Brobergip inunnik immikkoortitsilluni taasisitsisoqartarnissaanik oqaaseqarneranut sapaammili naqqiuteqarami mianersorluni maannamut nipaallisimaarpoq.

Taavami ataatsimoorlutik nalunaaruteqarpata isumaqatigiissuteqarsimallutik nikisitsinatik Naalakkersuisuni ingerlaqqinniarlutik. Tamanna Múte B. Egedep sanngiinneranut ersiutaassava?

- Utaqqiloorpugut Naalakkersuisut siulittaasuat qanoq aalajangissanersoq tusarniarlugu. Ullut sisamassaat utaqqivugut. Suli aalajanginngilaq. Aalajangeriataarsinnaassutsimik pisumi tassani suli takutitsinngilaq, Jens Thorin oqarpoq.

AAMMA ATUARUK Berlingske: Vi har ikke fejlciteret Pele Broberg

- Taamaattumik aalajangeriataarsinnaassuseq takutinngikkuniuk aamma pisuni allani partiimit suleqatigisaminit misilinneqaatigisinnaavaa.

Jens Thorinillu oqarnera naapertorlugu nalunarpoq Inuit Ataqatigiit ikinnerussuteqarlutik naalakkersuisuutitaqarusussanersut.

- Illuatungiliuttummi apeqqusissangamikku ilumut suleqatigiissinnaanerlutik urani peqqutigalugu, oqarpoq.

- Taamaalissappat aamma apeqqutaalluinnarpoq Naalakkersuisut siulittaasuata qinersinissaq aalajangiutissaneraa. Imaluunniit isumaqatigiinniarnissat Siumup siulittaasuanut isumageqqussanerai. Taannami aamma periarfissaammat.

Suliaq naatsumik:

  • Aviisip Berlingskep nunanut allanut naalakkersuisoq Pele Broberg apersorsimallugu sapaammi saqqummiuppaa.
  • Taanna apersorneqarneqarnermini oqarpoq eqqartortikkusullugu Kalaallit Nunaata siunissami namminiilivinnissaanut taasisitsinermi kikkut taasisinnaatitaasariaqassanersut. Kalaallinit kingoqqisut kisimi taasisitsinermi peqataasinnaasariaqartut, Pele Broberg oqarpoq.
  • Taamali oqaaseqarnera Múte B. Egedep (IA), naalakkersuisunut siulittaasuusup, sakkortuumik akerlilerlugu ullup ingerlanerani naqqiuteqarfigaa. Aatsaallu siullerpaamik Pele Brobergimut akerliliivoq.
  • Atassutip Pele Broberg naalakkersuisunit tunuartinniarlugu naalakkersuisuni nikittoqartariaqarneranik ataasinngornermi piumasaqarpoq.
  • Demokraatillu taasisinnaatitaanermut oqaatigineqartut 'ajorluinnartutut' taavaat.
  • Pele Brobergilu Facebookimi takkajaarsuarmik ataasinngornermi unnukkut allaaserisaqarpoq. Tassani allassimasoq Berlingskep allaaserisamini 'isummanik' allanngortitsimasoq. Pele Brobergillu nammineq aamma 'inuiaat namminiilivinnissamut taasitinneqarnissaanni Inuit kisimik taaseqataasinnaasariaqarnerarlugit' issuarneqarsimani eqqunnginnerarpaa.
  • Berlingske allaaserisamini isummanik allanngortitsisimanani KNR-imut ataasinngornermi ilisimatitsivoq.


Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat