Naligiissitaanissamut Siunnersuisoqatigiit ambassadørii Nuummi pikkorissartut
Ambassadørinik Nuummi uani sapaatip akunnerata naanerani pikkorissartoqarpoq!
Ambassadørilli taakku nunanit allaneersuunngillat – tassaappulli Naligiissitaanissamut ambassadørit – taakku arfineq’marluk Naligiissitaanissamut Siunnersuisoqatigiinniit kalaallinit toqqagaapput.
Taakkununnga ilaavoq Maasinnguaq Berthelsen Qeqertarsuarmeersoq.
Maasinnguaq Berthelsen ambassadøritut sulisinnaanerluni ukioq manna aperineqarami akuersisimavoq, sulinini maannalu pikkorissarnertik assut soqutiginartinnerarpaa. Kisinnani innuttaasunut tamanut sassarsinnaaneq pikkorissarnermi ilinniarneqarpoq. Maasinnguaq Berthelsen oqarpoq, oqaaseq naligiissitaaneq siornatigut tusartaraluarlugu annertunerusumik eqqarsaatigisarsimanngikkini.
Ambassadørit ilumut atorfissaqartinneqarnersut aperigatsinni Maasinnguaq Berthelsen oqarpoq, ilumut atorfissaqartinneqartut, naligiissitaanermut inatsisip inuiaqatigiinnut paasitinnissaa pisariaqarmat, naligiissitaanermut ukiuni kingullerni ilisimalikkatik ersarimmata, tassa arnat angutillu naligiinnginnerat ersarimmat.
Qinersinissap qalliartornerani sulissutiginiarnerpaat arnat amerlanerusut qinigassanngortinnissaat, tamatumunnga Maasinnguaq Berthelsen akivoq, arnat amerlanerusut qinigassanngortissinnaappata ajunngissagaluaqisoq, qujanassaluaqisorlu arnat angutillu amerlaqatigiit qinigaasinnaappata.
Naligiissitaanermut Siunnersuisoqatigiinni siulittaasup tulleraa Karna Jochumsen. Taanna isumaqarpoq, ambassadøreqalerneq siuarsaataasoq, Naligiissitaanermut inatsit tunngaviusoq taamaalilluni inuiaqatigiinnut paasisitsissutigineqarsinnaalermat.
Karna Jochumsen ilanngullugu oqarpoq, mappersagaaqqanik sanatitsiniarlutik, taakkulu angutinut saaffiginnissasut, neriuutigineqarporlu angutit gruppiliorsinnaassasut, angutit naligiissitaanerunissaat gruppimi anguniarneqarniassammat.
