Naligiissitaanissamut inatsit sinnassaataassanngilaq

Ulloq 20. maj atorluarneqassaaq naligiissitaanerup aqqani nalilersuiffigissallugu aammalu ilumut naligiissitaanersugut oqallisigissallutigu, Martha Lund Olsen nalunaarpoq.
Martha Lund Olsen Assi © : Paalu Møller/KNR
maajip 20-at 2015 06:00

Nunatsinni Naligiissitaanermut Siunnersuisoqatigiit pilerseqqammerpagut. Naalagaaffiit Peqatigiit ataani CEDAW-mi isumaqatigiissut pillugu siunnersuisoqatigiiffimmi soraarummeersinneqaqqammerpugut, tamatumali saniatigut arnat ulluat 8. marts nalliussereernikuullutigu.

-Junip qaammataani Danmarki suleqatigalugu, Nunat Avannarliit suleqatigiiffiata ataani naligiissitaaneq pillugu Nuummi isumasioqatigiissitsissaagut, ilaqutariinnermut, naligiissitaanermut isumaginninnermullu naalakkersuisoq, Martha Lund Olsen tusagassiuutinut allappoq.

Nunarput CEDAW-imi isumasioqatigiinnit nersorniarneqarpoq ilaatigut naligiissitaanermut inatsit nutaaq pillugu. Taanna 2013-mi akuersissutigineqarnikuuvoq.

 

Aamma atuaruk Angutit inuiaqatigiinni kalaallini inissisimanerat sammineqalersoq

 

Suli pitsanngorsagassaqarpoq

Iluatsissimasat uniffigiinnarneqassanngitsut, naligiissitaanerullu iluani suli pitsanngorsagassanik unammilligassaqartoq, soorlu angutit arnallu akornanni annersaasoqartarnerata annikillisarniarlugu, naalakkersuisoq allappoq.

-Taamaattumik piffissami qaninnermi naalakkersuisooqatikka suleqatigalugit periusissanik ilusilersuisariaqarpugut, ilaatigut CEDAW-imi isumasioqatigiinnit tikkuarneqartut sulissutiginissaani aqqutissarsiornermi.

Tamatumani kikkulluunniit suleqataanissaminnut tikilluaqqusaapput, Martha Lund Olsen oqarpoq.

 

Naligiisitaaneq - arnanuinnaanngilaq

Naligiissitaanermut arnat kisimik pineqanngillat, aamma angutit amerlaqisut ineriartornermi katataasarput aammalu inuiaqatigiit suiaassutsikkut oqimaaqatigiissumik ingerlaaseqarnissaanut akornutaasarluni. Tamakkorpiaat sammineqassapput Nunat Avannarliit isumasioqatigiissitsineranni ”Suiaassuseq, Ilinniartitaaneq Innuttaasullu nuttarnerat” qulequtaralugit sammineqarniarput.

Isumasioqatigiinneq Nuummi juunip 17-ani ingerlanneqassaaq, peqataasussallu tassaallutik Nunanit Avannarlerni aallartitarpaalussuit nunatsinniillu soqusallit sinniisaat.