Naligiissitaanermut siunnersuisoqatigiit utaqqerusupput

Aamma akileraartarnermut atugarissaarnermullu ataatsimiititaliap misissuinera utaqqiinnarpaat.

Nunatsinni inuit 2009-mi isertitaat pillugit kisitsisit kinngulliit Naatsorsueqqissaartarfiup qanittukkut saqqummiuppai. Tassani erserpoq angutit agguaqatigiisillugu isertitaat arnat agguaqatigiisillugu isertitaanniit 33 procentimik qaffasinnerusut. Ukioq kingulleq 40 procentimik qaffasinnerupput.

Naatsorsueqqissaartarfiulli suliffiit suuneri sulinerullu annertussusai misissorsimanngilai, taamaammallu assigiinngissut sumik peqquteqarnersoq oqaatigineqarsinnaanani.

Naligiissitaanermut siunnersuisoqatigiit paasissutissanik kisitsisinillu katersuiniarlutik siorna marsimi nalunaarput. Kisianni tassa taamanili iliuuseqaqqissimanatik.

Kisianni tassa Naligiisitaanissamut siunnersuisoqatigiinnit taamanili qanoq iliuuseqartoqaqqissimanngilaq, tamannalu Naligiisitaanissamut siunnersuisoqatigiit siulittaasup Poul Hansenip ilaatigut ima nassuiarpaa:

- Misissuisitsinngilagut tusaratsigu aamma Ruth Heilmann misissuisitsisoq. Kisitsisit suli saqqummiunneqanngillat, taamaammat utaqqiumaarpagut taakku, Poul Hansen oqarpoq.

Akileraartarneq atugarissaarnermullu ataatsimiititaliamit nalunaarut inaarutaasoq martsip arfineq-pingajuani saqqummiunneqassaaq. Misissuisitsinerullu inernera naapertorlugu, suliamut immikkut ilisimasalik Naligiisitaanissamut siunnersuisoqatigiit apriilip naanerani ataatsimiinnissaannut peqataassasoq, Poul Hansenip oqaatigaa.

Isertitat assigiinnginnerannut peqqutaasut suuneri isumalioqatigiisitamit maannangaaq ilimagineqartut tassaapput:

- Tapit assigiingitsut angutinut tukkajuttarnerat, angutit suliffigikkajutanni, soorlu sanaartornermi, isetitarissaarneruneq, aamma peqqutaaqataasinnaavoq, Poul Hansen oqarpoq.