Naligiissitaanermut Siunnersuisooqatigiit isumalluarput
Arnat suliffeqarfinni pisortatut inissittartut amerlanerussappata, qaammarsaanikkut oqallinnikkullu anguniarneqartariaqartoq, Naligiissitaanermi Siunnersuisooqatigiit siulittaasuat, Agathe Fontain oqarpoq, aammali arnat ilinniakkaminnik naammassinnittartut amerlanerujartuinnarneri eqqarsaatigalugit neriulluarpoq:
- Arnat taama pisinnaatitaaffeqarnerat qaammarsaanikkut anguniarneqartariaqassaaq. Kisianni arnat ilinniakkaminnik naammassinnittartut amerliartuinnarnerat, arnat pisortat siunissami amerlanerulernissaannik neriulluarnarpoq, Agathe Fontain oqarpoq.
Inatsit malillugu pisortat suliffeqarfiini siulersuisuni inuttat sapinngisamik angutit arnallu akornanni agguataarsimasussaanerat tunngavigalugu, maajimi ataatsimiinnerminni naalakkersuisunut saaffiginnissuteqarsimallutik aamma Agathe Fontainip oqaatigaa.
Agathe Fontain isumaqarportaaq, arnat angutillu, suliap suunera apeqqutaatillugu amerlassuseqartarnerat ilinniaqqinnissamik kajumissaarinermi saqqumilaartinneqarnerusariaqartoq, assersuutigalugu arnat, angutit suliarikkajuttagaannik aamma ilinniagaqarsinnaammata killormullu angutit aamma arnat suliarikkajuttagaannik ilinniagaqarsinnaallutik.
