- Ajornartorsiutit taamaattut oqaluuserilluarsinnaanerulerigut isumaqarpunga. Suiaassuseq pillugu pissusilersorneq oqalunnikkulluunniit nakkarsaaneq oqaluuserissallugu maannamut ajornarluinnangajappoq, Mariekathrine Poppel oqarpoq. Assi: Ilisimatusarfik / Emil Stach

Naligiissitaanermut adjunkti Mikael Petersenimut eqqartuussut pillugu: Eqqartuussivimmit oqaatigineqartoq tunngavigilissavarput

Narrunarsaaneq pillugu eqqartuussinerup eqqaamasassaalersup sullivinni narrunarsaasaneq suiaasuseq pillugu pissusilersortarneq akuerisassaanngitsuusoq erseqqissarpaa. Ilisimatooq naligittuunermik ukkassisoq taama naliliivoq. Aki-Matilda Høegh-Dam oqilivoq.

Siumumi kingornalu Naleqqami allattaarnerusimasoq Mikael Petersen suiaassuseq pillugu narrunarsaasarsimasutut pisuutinneqarmat, nunatsinni eqqaamasassaasumik sisamanngormat eqqaattuussineqarpoq.

Taamatullu eqqartuussineq sullivinni narrunarsaasaneq suiaasuseq pillugu pissusilersortarunnaariartornermut aallaqqaataasinnaavoq.

Ilisimatusarfimmi ilinniartitsisoq naligiittuunermik ukkataqartoq, Mariekathrine Poppel, taama naliliivoq.

- Inuit suiaassusiat pillugu nakkarsaaneq akuerisassaanngitsoq, eqqartuussiviup oqaatigaa. Tamatumalu aamma isumagaa, arnat angutillu suiaassuseq pillugu nakkarsagaasut politiinukarlutik oqaatiginnisinnaasut, pisorlu suliassanngortillugu, taanna nassuiaavoq.

Ajornartorsiutit oqaluuserinissaat ajornannginnerulissasoq

Mariekathrine Poppelip oqarnera napertorlugu sullivinni oqalliffinniluunniit arnat oqaluuserisassanngortillugit angutit qulangersimannittuunissaat akuerisassaajunnaartoq, eqqartuussutip ersersilluinnarpaa.

- Ajornartorsiutit taamaattut oqaluuserilluarsinnaanerulerigut isumaqarpunga. Suiaassuseq pillugu pissusilersorneq oqalunnikkulluunniit nakkarsaaneq oqaluuserissallugu maannamut ajornarluinnangajappoq, taanna oqarpoq.

AAMMA ATUARUK Mikael Petersenip suliassanngortitseqqinnera: Pineqaatissinneqarsimasunut ulluni 40-ni inissiisarfimmiittussanngortinneqarpoq

Mariekathrine Poppelip aamma neriuutigaa, taamatut eqqartuussinerup arnat amerlanerusut oqalliseqataalernissaat immaqalu politikkimi akuunerulernissaat ajornannginnerulersissagaa. Taava aamma taamatut eqqartuussineq angutinik nakkarsaasunik oqaluuserinninnissamut atorneqarsinnaavoq.

- Katsorsagaanissamut, peqqissagaanissamut oqaloqateqartarnissamulluunniit eqqartuussisoqartarnersoq nakkutigissavarput, taanna oqarpoq.

Tassami eqqartuussinermi pillaaneruvoq, imaanngilarlu nakkarsaasoq pineqaatissinneqarsimasunut inissiisarfimmiikkuni taamaliortarunnaassasoq, taanna isumaqarpoq.

Aki-Matilda oqilivoq

Siumut sinnerlugu Folketingimut maanna ilaasortaq, Aki-Matilda Høegh-Dam, Mikael Petersenimit innarliineraasunut ilaavoq. Suliarlu eqqartuussinermik inerneqarmat oqilivoq.

Aamma taama eqqartuussinerup amerlanerusut naaggaartalernissaannik kingueqassasoq neriuppoq.

- Neriuppunga illit eqqortoq nalungikkukku suunersoq taav asuliaq ingerlateqqittassagit. Aamma nassuiaassut taanna unittussutiginagu kanngusuuteqarnak - illit taamatut misigisaqartussaannginavit - arlaanni ingerlateqqittasagipput. Uppernarsivarputtaamannak, ataatsimoorluta taamannak ingerlariaqqikkutta aatsaat allannguisoqarsinnaasoq, tanna taama oqarpoq nangillunilu:

- Taava massakkut neriuppunga, kikkuugaluartulluunniit toqqissisimallutik suliffeqarsinnaasut. tassa neriuutiga, Siumut sinnerlugu Folketingimut ilaasortaq, Aki-Matilda Høegh-Dam oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl