Naligiissitaaneq ulloqartinneqalerpoq
Ukiumut ataasiarluta ullup aalajangersimasup naligiissitaanerup aqqani ulloritinneqartalernissaa Inatsisartuni amerlanerussuteqartut ippassaq akueraat. Inatsit aappassaaneerneqarnerani inatsisartuni najuuttut 22-usut siunnersuummut akuersipput.
Naligiissitaanermik Siunnersortit nunatsinni 1998-mi aallartinnerat malunnartinniarlugu ilaqutariinnermut ataatsimiititaliap siunnersuutigaa maajip 20-at naligiissitaanermut ulloritinneqassasoq.
Juliane Henningsenip IA-meersup naligiissitaaneq pillugu ulloqartalernissaa siunnersuutigaa, ukiorlu kingulleq inatsisartut ukiaanerani ataatsimiinneranni siullermeerutaasumik suliarineqarluni. Ilaqutariinnermut ataatsimiititaliap eqqarsaatigisimavaa, ulloq taanna qanoq atorneqarsinnaanersoq, suullu sammineqarsinnaanersut.