Naligiissitaaneq suli anguneqanngilaq

Ilisimatusarfimmi naggataarutaasumik bachelorprojektimini arnat nunatsinni inissisimanerannik misissuisimasoq Dorthe Greiffenbergima naliliivoq:

- Siornatigut pilersuisussatitaanermit naligiissitaanermut nuunneq angutit artorpaat, naluippaat, Dorthe Greiffenberg oqarpoq.

Siulersuisuunerni ilaasortat suliffeqarfiillu qullersaanni, arnat atorfillit amerlassusaat najoqqutaralugit, angutit qanga pilersuisussaatitaaneranniit arnat naalagarsiortarsimanerat suli atuuttartoq, ullumikkut arnat pissusiini periusaannilu ersertartoq Dorthe Greiffenbergip oqaatigaa.

Dorthe Greiffenbergip suliamini erseqqissarpaa ukiuni makkunani arnat siuaraluttuinnarnerat malunnartoq, siornatigorniit arnat politikkimi suliffeqarfissuarnilu qaffasissuni atorfinittartut amerliartormata.

Inatsit 1985-meersoq malillugu nunatsinni naligiissitaaneq atuuppoq, kisiannili pissutsit ilumoortut isigigaanni atuutsinneqannginnera ersertarpoq kisitsisitigummi ersermat, suliaqarfinni amerlanerpaani qaffasissumik atorfillit pingajorarterutaannaat arnaasut, taamaattoq suli naligiissitaaneq tamakkiisumik atuutinneqarneranik Dorthe Greiffenbergip assortuisuunerarpaa.

Arnalli ullumikkut oqaaseqarsinnaanertik nammineersinnaassusertillu tamatigut ersersilluartalerpaat.

- Inuussutissarsiornermi politikkimilu arnat siuariartorput. Arnat aamma oqartussaaqataasut angutinit paasineqarnikuuoq, Dorthe Greiffenberg oqarpoq.

Dorthe Greiffenbergip suliaa taaguuserneqarsimavoq "Kalaallit Nunaanni inuiaqatigiinni arnat inissisimaneranni siornatigut, manna siunissamilu naligiissitaaneq immikkut sammillugu".