Naligiissaarinermut iluarsartuusseqqinnissaq kinguarteqquaat
Kommuneqarfik Sermersooq Naalakkersuisunut taama kaammattuuteqarpoq.
Kommuninut ataatsimoortumik tapiissutit Naalakkersuisunit sapaatiuppat agguaanneqartussaapput. Kommuneqarfik Sermersuumi pisortaaneq Steffen Ulrich-Lynge ima oqarpoq:
- Nutaamik aalajangerniarneq inuiaqatigiinnut pinngitsuunngiivilluni annertuumik sunniuteqartussaavoq. Innuttaasut, maanilu kommunitsinni innuttaasut minnerpaamik isumasioqqaarneqartariaqaraluarput, tamannalu pissutigalugu allannguiniarnerup minnerpaamik ukiumik ataatsimik kinguartinneqarnissaa piumasaraarput, Kommuneqarfik Sermersuumi pisortaaneq Steffen Ulrich-Lynge oqarpoq.
Kommuneqarfik Sermersuup ukiumoortumik naatsorsuutai, Grønlands Revisionskontorimi pisortap, kukkunersiuisullu, Knud Østergaardip, Radioaviisi sinnerlugu upernaaq misissorpai.
Kommuneqarfik Sermersuup siorna ukiup naalernerani karsimiittuutai ernumanartoqartut, Naalakkersuisut nalilerpaat, sukannersumillu nakkutigisarilerlugu.
Naallu kommuni milliardit aappaa avillugu kaaviiaartitaqaraluartoq, Namminersorlutillu Oqartussanit sukannersumik nakkutigineqaraluartoq, aningaasanik pisariaqartitsinngitsoq, Knud Østergaardip oqaatigaa, aningaasanillu aqutsilluarnerusoqaannartariaqarsoralugu.
Kommuneqarfimmi taama aningaasaateqartigisimasappat, taava kommuninut allanut maligassiuiinnanngila, nammineersinnaassuseqarninilu takutillugu? Steffen Ulrich-Lynge aperaarput, akivorlu:
- Aningaasanik amerlanerusunik piumasaqanngilagut, aningaasanilli sukannersumik maanna aqutsilluta. Taassuma saniatigut pilersaarusiorpugut aningaasatigut ukiup sinneranut qanoq aqutsisoqassanersoq, kommunalbestyrelsilu tamanna pillugu qaammatip tulliani aalajangiisussaalluni, Steffen Ulrich-Lynge oqarpoq.
Naatsorsueriaaseq sorleq sulinermi tunngavigineqarnersoq apeqqutaalluni Kommuneqarfik Sermersuup missingersuutaani aappaagu 138 millionit koruuninik pissarsisinnaassaaq, ajornerpaappallu 269 millionit koruuninik amigaateqalersinnaassalluni.
Ajornerpaamik pisoqassappat akileraarutit 8 procentpointinik qaffanneqassapput. Allatulli oqaatigalugu: Aningaasat 269 millionit koruunit assigaat meeqqat atuarfiannut aningaasartuutit 90 procentii.
Kommunit akornanni naligiissaarinermut iluarsartuusseqqinnissaq pillugu Naalakkersuisut taamaammat maanna aalajangiiniarnerat tuaviuussaavallaartoq, Steffen Ulrich-Lyngep oqaatigaa:
- Suliap massakkut killiffia ernumanartorujussuuvoq, pissutigalugu massakkut suliap killiffianinngaanniit politikerinut tunniussassavut assut, uanga isumaga malillugu, tulluutinngillat politikerinut sassaalliutigissallugit, tassami periarfissarpassuit taakkartorneqaramik nalilersortariaqassallutillu, Kommuneqarfik Sermersuumi pisortaaneq Steffen Ulrich-Lynge oqarpoq.
