Naligiisitsineq atorfinni qaffasinnerusuni atuutinngilaq
Air Greenland naligiissitaanermik politikkimik pisortatigoortumik peqanngilaq.
- Ukiut 50-it timmisartortitseqatigiiffiup ingerlanerani pisariaqartitsisunik oqartoqarnikuunngilaq, akissaatit tungaatigut aaliangersaasoqartarami assigiinngisitsisoqarfinnaanani, sulisoqarnermut pisortaq Mads Christensen oqarpoq.
Air Greenlandimiinnaanngitsoq angutit amerlanerussuteqarput. Namminersorlutik Oqartussat suliffeqarfiutaanni angutit pissaaneqarnerusutut inissisimapput, assersuutigalugu Royal Arctic Linep siulersuisuini qulingiluanik ilaasortaqartumi taamaallaat arnat marluk issiapput, pisortatut atorfiit sinneri tamarmik angutinik inuttaqarput.
Royal Greenlandip siulersuisuini arnat marluk ilaasortaapput, pisortatullu atorfiit tamarmik angutinik inuttaqarlutik.
Tele Greenland aamma angutaannangajannik aqunneqarpoq, taamaallaat arnaq ataaseq eqqaassangikkaanni. Siulersuisuinilu issiasut qulingiluat akornanni arnat pingasuupput.
Atorfiit qaffasinnerit angutaannangajannit tigummineqarnerat, Kalaallit Nunaanni politikki pillugu TV 2-p nittartagaatigut allaaserinnittartup Nini Biilmannip, tupaallaatigeqaa.
- Angutit arnallu ilinniarluarsimasut naligiimmik atorluarneqannginnerat, assut tupigusuutigaara, taamaalilluni nunap pisuussutai tamakkiisumik atorluarneqanngimmata, Nini Biilmann oqarpoq.
Suiaassuseq pissutigalugu aningaasarsianik naligiinngisitsisoqanngilaq, taama oqarput suliffeqarfiit arlallit namminersortunit pigineqartut.
Siunissaq eqqarsaatigalugu naligiissitaanermut politikkiliornissaq avaqqunneqarsinnaanngitsoq, Air Greenlandip sulisoqarnermut pisortaa Mads Christensen oqarpoq
- Kisitsisit qimerloorlugit takusinnaavara Air Greenlandimi siuttuusut taamaallaat 29 procentii arnaasut, tamannalu politikkeqarnikkut allanngortinniarneqarsinnaavoq. Naligiissitaanermut politikki uppernassuseqassapput misissueqqissaartoqartariaqarpoq, Nini Biilmann isumaqarpoq.
Sooq arnat pisortatut ilinniarsimanertik atunngikkaat paasiniarneqarsinnaasoq Nini Biilmann isumaqarpoq.
- Sooq qinnuteqartanngillat? Sunaana aporfigigaat?
Naalakkersuisoqarpoq naligiissitaaneq pillugu sammisaqartumik, taakku misissueqqisaartitsisariaqaraluarput, Nini Biilmann oqarpoq.
Naalakkersuisut naligiissitaanermut politikkeqarput, naalakkersuisuni qulingiluaasuni arnat sisamaapput, naalakkersuisoqarfinni pisortani qulingiluaasuni tallimat arnaallutik.
