Naligiimmik atugaqarnissaq Kattusseqatigiit sulissutiginiarpaat

Kattusseqatigiit Folketingimut qinigassanngortitaat inissipput. Kattusseqatigiit pingasunik sassartitaqarput, tassa siulittaasoq Anthon Frederiksen, Soré Mølgaard aamma Niels Olsen.

Kattusseqatigiillu ministeriunissatut piukkussaminnik tikkuaanissartik utaqqisikkusuppaat.

- Soorunami nunatsinnut pitsaanerpaamik sulissuteqarusuttoq toqqassavarput. Aammali qinersinerup inernera isumaqatigiinniarnissallu aalajangiisooqataassapput, Anthon Frederiksen oqarpoq.

Kattusseqatigiit qineqqusaarutaat pingaarnerit pingasut Anthon Frederiksen-ip ima saqqummiuppai:

-Naalagaaffeqatigiinnermi innuttaasut naligiinnerusumik atugassaqartitaalernissaat sulissutigerusupparput. Soorlu meeqqat nunatsinni Danmarkimut naleqqiullutik appasinnerujussuarmik tapeqartinneqarnerat iliuuseqarfigerusupparput, Danmarkimi angajoqqaat isertitaat apeqqutaatinnagit meeqqat tapisitinneqartarlutik.

- Aamma inunnik immikkoortitsisoqannginnissaanik inatsisit tunngaviusut aalajangersagaat malersukaarniarpagut. Soorlu politiit akissarsiaqarnikkut assigiinngitsorujussuarmik pineqarput, pissutsillu tamakku naalagaaffeqatigiinnerup iluani iluarsineqarnissaat Kattusseqatigiinnit sulissutigerusupparput, Anthon Frederiksen oqarpoq.

Pingajuattut Eqqartuussiveqarneq pillugu Ataatsimiititaliarsuup suliaasa naammassineqarnissaat inassutigineqartullu piviusunngortinneqarnissaat Kattusseqatigiit sulissutiginiarpaat.

Kattusseqatigiit qinigassanngortitaat atsiornernik 100-inik tamarmik immikkut katersisussaapput, taakkulu kingusinnerpaamik januaarip 28-anni tunniunneqareersimassapput. Maannamut atsiornerit 100-it Ilulissani katersorneqareersimasut Anthon Frederiksenip oqaatigaa.