- Kisianni uagut sisamaannannguakkuluugaluarluta ilaasortat, ilaasortaasunit 16-sariaqarnermit tunuliaquteqarnissamut taanna angorusupparput januaarimit atuutilernissaa, aamma piumasaqaatinut sakkortuunut ilaatipparput, neriorsuutaaginnaqqinnginniassammat, Jens Napaattooq oqarpoq.Assi: KNR / Malik Brøns

Naleraq aningaasanut inatsisissatut siunnersuummut akerliliivoq: Qaleralinnut akitsuut peerneqassaaq

Naleqqamit, Jens Napaattuup parteeqatimi aningaasanut aappaagumut inatsisissatut siunnersuutaat, sinerissap qanittuani qaleralinnut akitsuut peerneqanngippat akuerinianngilaa.

Inatsisartunut ilaasortap, Jens Napaattuup, sinerissap qanittuani qaleralinnut akitsuutip peerneqarnissaa anguneqanngippat aningaasanut inatsisissaq akuerseqataaffiginianngilaa.

Inuit Ataqatigiit Inatsisartunut ukioq qineqqusaarnermi sinerissap qanittuani qaleralinnut akitsuutip peernissaa toqqaannartumik qineqqusaarutigaat.

Aningaasaqarnermut naalakkersuisup, Asii Chemnitz Narupip (IA), Naalakkersuisut aningaasanut aappaagumut inatsisissatut siunnersuutaat saqqummiukkamiuk akitsuut suli allassimavoq.

Taamaammat sinerissap qanittuani aalisartut qaleralinniartut pisaasa 4 procentii suli akitsuuteqassapput.

Tamanna nunatta karsianut ukiuni sisamani, ukiumut 16 millionit koruuninik iluanaarutaassaaq.

AAMMA ATUARUK Aalisartoq: Qaleralinnut akitsuummut 1,5 millionit koruunit akiliutigereerpakka

Jens Napaattuup politikerit qineqqusaarutiminnik eqquutitsinngitsut tatiginassusaasa innarlerneqarnissaat akuersaanngilaa.

- Tassa aalisartorpassuit qularutiginngilara Inuit Ataqatigiit nuimasut ilaasa nipituuliuutigalugu taanna peertariaqartoq suaarutigimmassuk, aamma taasinermi taakkununnga kinguneqarsimasoq, Jens Napaattooq oqarpoq, nangillunilu:

- Taamaammat oqaatigineqartut ukiorpassuillu qineqqusaarutigineqartartut piviusunngunngitsoortarnerat qiviaraanni, taamaalioqqissagaluarutta aamma politikerinut tatiginninnerup annikillivallaannginnissaa piniarlugu, tatiginassuseq neriorsuutit piviusunngortinniarnissaannut isumaqarpunga tamaviaarnerusariaqartugut.

- Taamaaliunngikkaannilu toqqammavilersortariaqarpoq sooq taamaaliortoqannginnersoq, sunalu peqqutaasimanersoq.

Naleraq tapersersuisussarsiussasoq

Inuit Ataqatigiinnit aalisarnermut, piniarnermullu naalakkersuisup, Aqqaluaq B. Egedep, akitsuutip peerneqarnissaa qineqqusaarnermi neriorsuutigigaluarpaa.

Aningaasaqarnermulli naalakkersuisup, Asii Chemnitz Narupip, Naalakkersuisut Aalisarnermut ataatsimiititaliarsuup isumaliutissiissutaa utaqqeqqaarlugu, qaleralinnut akitsuutinut allannguiniarlutik KNR-imut allakkatigut siusinnerusukkut nassuiaavoq. Ataatsimiititaliarsuup pilersaarutai naapertorlugit taakku suliaat qaammatip matuma naanerani saqqummiunneqassapput.

Jens Napaattooq allallu sinneri Inatsisartuni partiimiittut akitsuutit peerneqarnissaannut tapersersortissarsiorniarpoq.

AAMMA ATUARUK KNAPK qaleralinnut akitsuut pillugu: Qinersisartunik aalisarneruvoq

- Kisianni uagut sisamaannannguakkuluugaluarluta ilaasortat, ilaasortaasunit 16-sariaqarnermit tunuliaquteqarnissamut taanna angorusupparput januaarimit atuutilernissaa, aamma piumasaqaatinut sakkortuunut ilaatipparput, neriorsuutaaginnaqqinnginniassammat, Jens Napaattooq oqarpoq.

Naalakkersuisoqatigiit Inuit Ataqatigiit Nalerarlu ataatsimut 16-inik qinigaatitaqarput.

Inuit Ataqatigiit aqqaneq-marlunnik Nalerarlu sisamanik qinigaatitaqarluni.

Tamatuma Inatsisartuni akuerineqarnissaanut 16-inik akuersisoqarnissaa pisariaqarpoq.

Taamaammat Naleqqap piumasani, tassa qaleralinnut akitsuutip peernissaa anguneqanngippat, aningaasanut aappaagumut inatsisissaq ukiamut akuerinianngilaat.

Kissaatigiinnarnagu Naleqqamit piumasarivarsi?

- Suu!

 

Aningaasaqarnermut naalakkersuisup Inuit Ataqatigiinneersup, Asii Chemnitz Narupip, Aningaasanut Inatsisissami Naleqqaminngaannit kissaatit tusaallugit oqarpoq, Jens Napaattuumulli paatsoorneqarsinnaanngitsumik mannakkut akinissamut piareersimanngilaq.

KNR-imut ima oqarpoq:

- Septemberip ulluisa 28-ata kingorna isumaqatigiinninniarnerit ingerlanneqassapput aamma taakka qilanaaraakka.

- Isumaqatigiinninniarnermi soorunami piumasaqaatit aamma illuatungilerneqarlutik naaperiaanissamik piumassuseqarnissaq pingaartorujussuuvoq, kisianni annerusumik oqaaseqarfiginagu oqaannassuunga tusaava taama oqariartornera, Asii Chemnitz Narup oqarpoq.

2022-mut Aningaasanut inatsisissap novembarip 15-anni pingajussaaneerneqarnissaa naatsorsuutaavoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat