Naleqqussarnissamut piareersimaneruvugut

Issittumi silaannaap allanngoriartornerata kingunerisaanik inuiaqatigiit nunatsinniittut Nunavumiittullu issittumi nunani allani najugalinnut sanilliullutik naleqqussarnissaminnut piareersimanerusut, issittumi pissutsinik ilisimasallit taama eqqoriaasut, Københavnip ilisimatusarfiani eskimologi issittumilu ilisimatusarfimmi lektori Frank Sejersen oqarpoq.

Naalagaaffeqatigiinnerup iluani Namminersornerullutik Oqartussat Nunavumilu naalakkersuisut namminneq nunaminni inuiaqatigiit aaqqissugaanerannik aalajangiinissaminnut tunngaviusumik pisinnaatitaasut Frank Sejersenip erseqqissarpaa. Issittumili nunani allani soorlu Alaskami, Sibiriami Saamillu nunanni pisinnaatitaaffiit pigineqanngillat.

- Inuiaqatigiit aaqqissuussaanerannik allanngortiterisoqarsinnaasariaqarpoq, pingaaruteqarporlu politikkimik aqutsilluarnissaq, tunngaviusumillu pisinnaatitaaffeqarnissaq nuna, kulturi oqartussaaqataanerlu eqqarsaatigalugit. Matumanilu Kalaallit Nunaat kusanarluinnartumik inissisimavoq. Apeqqutaavorli iliuuseqarnissamut periarfissaqarluarnersoq. Frank Sejersen oqarpoq.

Taamaattumik Namminersornerullutik Oqartussat politikkikkut atortutigullu periarfissanik misissuisariaqarnerarpaa.

- Nunanut allanut tunngatillugu politikkikkut pisinnaasaqarluarnersoq apeqqutaavoq, Sejersen erseqqissaavoq.

Aamma isumaqarpoq, silaannaap allanngoriartornera ilutigalugu politikkikkut sukkasuumik periuseqarsinnaasariaqartoq, soorlu aalisarneq, imaatigut assartuineq niuernermilu isumaqatigiissutit eqqarsaatigalugit.

Issittumi nunat allat, soorlu Sibiriami Alaskamilu, tunngaviusumik inatsisit malillugit aalajangeeqataasinnaanngillat, taamaalillutillu periarfissaat killeqartorujussuullutik.

- Namminersornerullutik Oqartussalli pitsaanerusumik inissisimapput, aqutsisoqarfinnik isumaginnittussanik nukittuunik pilersitsisimammata, taamaalillutik politikkikkut periarfissagissaarlutik. Apeqqutaavorli suliaminnik naammassinnissinnaassanersut. Frank Sejersen naliliivoq.