Assi: KNR

Naleqqap ataatsimoortumik tapiissutit namminiilivinnerup kingorna isumaqatigiinniutiginiarai

Nunatta namminiilivinnerata kingorna Danmarkimit aningaasatigut tapiissutaasartut pigiinnarneqarsinnaassagunarput, Partii Naleraq taama isumaqarpoq. Aamma nunatta naalagaaffeqatigiinnit anineratigut tapiissutit tamaasa Løkkep unitsinniaraluarpagilluunniit.

- Aningaasatigut tapiissutit unitsinneqarnissaannik allaqqasoqanngilaq. Taama allaqqasoqanngilaq.

Partii Naleqqameersoq namminiivilinnissaq immikkut sammillugu KNR-ip pingasunngormat unnukkut tv-kkut oqallitsitsinerata danskisoortaani taama oqarpoq.

Nunarput namminiilivissappat partiip 4,8 milliardit koruunit qanoq pissarsiariniarnissaannik aperineqarami Namminersorneq pillugu inatsimmi ataatsimoortumik tapiissutit pillugit oqaasertaliussat innersuussutigai.

AAMMA ATUARUK Danmark er ikke den eneste mulighed

Ataatsimoortumik tapiissutit danskit ministeriunerat naapertorlugu ukiumut 3,8 milliardit koruunit missaanniipput, taakkununnga ilanngunneqassallutik naalagaaffiup Danmarkip nunatsinni suliassaqarfiinut aningaasartuutigisartagai ukiumut 1 milliardit koruunit missaanniittut.

Lars Løkke Rasmussenilli nunarput namminiilivissappat tapiissutit unitsinneqarnissaat arlaleriarluni, kingullermik Folketingimi ukioq manna januaarimi, oqaatigisimavaa:

- Aappaattullu takorloorsinnaanngilara Kalaallit Nunaata namminiilivinnerata kingorna naalagaaffiup tapiissutaata suliassanilluunniit isumagisaqarnerata sivisunerusumik ingerlatiinnarneqarsinnaassasut, ministeriuneq taama oqarpoq.

Broberg: Namminersorneq pillugu inatsit periarfissaqartitsisoq

Oqallittoqarnerani toqqaannartumik aperineqarluni Brobergip erseqqissaatigaa”namminiilivinnermi nammineq akiligassanik akiliisinnaanissaq pingaaruteqarluinnartoq”. Ministeriunerullu nalunaaruteqarnera pillugu Naleraq sinnerlugu qinigassanngortittoq ima oqarpoq:

- Tassaavoq ersisaarinermik taaneqartartoq.

Demokraatit Inuit Ataqatigiillu isumaqarput Partii Naleqqap aningaasaqarneq pillugu politikkia innuttaasunik 'salloqqittaarnerusoq', Sara Olsvigilu (IA) naapertorlugu nunatta 'isumaginninnikkut misileraatigineqalerneranik' kinguneqartussaassalluni.

Nunatta naalagaaffiullu aningaasatigut atassuteqarnerat

Namminersorneq pillugu inatsimmut oqaasertaliussani immikkoortoq 5.3.1:

- Naalagaaffiup Kalaallit Nunaanni Namminersorlutik Oqartussanut tapiissutai 0 koruuninngortinneqarpata, namminersorlutik oqartussat naalagaaffiullu akornanni siunissami aningaasatigut atassuteqarneq Naalakkersuisut danskillu naalakkersuisuisa akornanni isumaqatigiinniutigineqassaaq (...). Illuatungeriit arlaannaaluunniit isumaqatigiinniarnermi angusamut aalajangersimasumut pituttugaassanngilaq.

Namminersorneq pillugu inatsimmi namminiilivinneq pillugu § 21-mut oqaasertaliussat:

- Inuiaat kalaallit namminiilivinnissamik aalajangissappata, Kalaallit Nunaata namminiilivinnissaa siunertaralugu isumaqatigiinniarnerit aallartinneqassapput.

Nunarpullu assersuutigalugu imermik avammut nioqquteqarnikkut, EU-mit tapiissutit aatsitassarsiornerlu aqqutigalugit aningaasatigut sipaaruteqarsinnaagaluartoq allatigullu isertitaqarluni, nunatta namminiilivinnerani Danmarkimit aningaasatigut tapiissutit isumaqatigiinniutigineqartariaqartut Pele Brobergip erseqqissaatigaa.

– Soorunami sipaarniuteqarnissamut periarfissat arlaqarput. Sipaarniarnissamullu periarfissat oqaloqatigiissutiginnginnerini namminersorneq pillugu inatsimmi qanoq allaqqasoqarnera oqaloqatigiissutigeqqaariartigu, Partii Naleraq sinnerlugu qinigassanngortittoq oqarpoq.

Ataatsimut tapiissutit 0 koruuninngortinnerini isumaqatigiinniarnerit

Namminersorneq pillugu inatsimmut oqaasertaliussat naapertorlugit tapiissutaasartut 0 koruuninngortinneqarpata, soorlu assersuutigalugu aatsitassarsiornermit isertitat pissutigalugit - nunatta Danmarkillu naalagaaffiup ataatsimoortumik tapiissutai pillugit isumaqatigiinniarnerit aallartissavaat.

Taamaattoqarneranilu illuatungeriit arlaannaalluunniit 'isumaqatigiinniarnermi angusamut aalajangersimasumut pituttugaassanngilaq", oqaasertaliussani tamanna allassimavoq.

Namminersorneq pillugu inatsimmi namminiivilinneq pillugu paragraf 21-mut oqaasertaliussani allassimavoq 'Inuiaat kalaallit namminiilivinnissamik aalajangissappata, Kalaallit Nunaata namminiilivinnissaa siunertaralugu isumaqatigiinniarnerit aallartinneqassapput'.

AAMMA ATUARUK  Aningaasanut inatsit naalagaaffimmit tapeqartariaqarnermut takussutissiivoq

Taamaammat nunatta namminiilivinnerani ataatsimoortumik tapiissutit ingerlaannassanersut politikkikkut isumaqatigiinniutigineqartussaassasoq, Broberg isumaqarpoq.

Partiilli naalagaaffeqatigiinnit avissaarnitta kingorna ataatsimoortumik tapiissutit ingerlaannarsinnaanissaat isumalluutiginianngilaa.

- Naagga, tamanna anguniagarinngilarput, Broberg oqarpoq.

Isummersuutit