Naleraq arfininngorpat, juunip 26-ianni ataatsimeersuassaaq, tassanilu siulittaasussamik taasisoqassaaq.Assi: KNR / Malik Brøns

Naleqqami siulittaasumik arfininngorpat taasisoqassaaq

Naleraq pingasunngrnermi ualikkut ataatsimeersuarneranni nutaamik siulittaasortaanissaminnik ulluliipput. Partiip siulittaasuat Hans Enoksen, inuttut peqquteqartumik, siulittaasutut tunuarniarluni ataasinngornermi nalunaaruteqarpoq.

Naleraq nutaamik siulittaasortaassaaq.

Inuiattut ullorsiornissatsinnut ulloq ataasiinnanngortoq, Naleqqap siulittaasuat, Hans Enoksen peqquteqarluni siulittaasutut tunuarniarluni nalunaaruteqarpoq.

Taassuma siulittaasutut tunuarniarnermini suna pissutaanersoq suli saqqummiutinngilaa, partiilli Hans Enoksenip tunuarneranut tunngatillugu pisariaqartitsinerata nalaani innuttaasut ataqqinninnissaat tusagassiuutinut nalunaarumminni kissaatigaat.

Ruttsi Lynge Lennert maanna Naleqqami siulittaasuugallarpoq.

Naleraq arfininngorpat, juunip 26-ianni ataatsimeersuassaaq, tassanilu siulittaasussamik taasisoqassaaq. Naleqqami siulersuisut pingasunngornermi taama aalajangerput.

Naleqqamut tunuliaqutaasut ataatsimeersualerunik imminnut najussanngillat. Qarasaasiaq atorlugu ataatsimeersuassapput. Tunuliaquttallu amerlanerpaartaasa tamanna akuerereerpaat.

- Allaffimminngaanniit isumasiuisimapput immikkoortortaqarfinnut taavalu nalunaarutigineqarpoq pingajorarterutaat marluk akuersisimasut ataatsimeersuarnissaq piaartumik ingerlatissasoq.

Ruttsi Lynge Lennert oqarpoq.

Maanna siulittaasuugallartoq partiimut ilaasortat ataasiinnarmik qinigassaqassagaluarpata, unammillernissaminut piukkunneqarsimalluni oqarpoq.

- Taamatut kajumissaarneqarpunga siulersuisuunerninngaanniit.

Pele Broberg Jens Napaattoorluunniit qinerneqassapput

KNR-p partiip politikkikkut oqaaseqartartua, Jens Napaattooq siulittaasunngulersaarnersoq attaveqarfigigaluarpaa, iluatsinnaguli.

AG-mi aaqqissuisuunerup, Christian Schultz-Loretnzenip, Sermitsiaq.ag-mut oqarnera naapertorlugu Pele Broberg aamma Jens Napaattooq siulittaasunngorniutissapput. 

- Partiimimi nuimanerpaat marluk, tassaasut Pele Broberg imaluunniit Jens Napaattooq ilimanarnerpaapput. Allamimmi siulittaasunngortoqassappat tupaallatsitserujussuartussaapput, Christian Schultz-Lorentzen kingullertut taaneqartumik ilimagisaqarnerusoq oqarpoq.

Hans Enoksen Naleqqamik 2014-imi pilersitseqataavoq, taamanerniilli siulittaasuulluni.

Hans Enoksen ukiorpassuarni politikikkut suliaqarnikuuvoq. Aamma Siumut sinnerlugu Naalakkersuisunut 2002-miit 2009-mut siulittaasuuvoq.

Taanna Naleqqami qinikkatut marloriarluni Inatsisartuniippoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl