Naleqassuseq misigissutsillu pingaaruteqarput

Upernavimmi imminortarneq ajornartorsiutaaleraluttuinnarpoq, pisullu ajungaarmata, allaat ajunaarnersuartut Upernavimmi Inunnik isumaginninnermut pisortamit nalilerneqarlutik.

23-nik ukiullip, Ane Marie Ottosenip, ikinngutaa 2004-mi imminorpoq, imminortarnerullu akiorniarneqarnissaanut suliniut peqataaffigilerpaa. Imminortarnerullu akiorniarneqarnerani misigissutsit oqaluuserineqartalernissaat pingaaruteqarluinnartut, Ane Marie Ottosen oqarpoq:

- Misigissutsit oqaluuserineqartalernissaat pingaaruteqartorujussuuvoq, sumiikkaluaraanniluunniit. Aliasukkaanni kanngunartoqanngilaq ikiortissarsiussalluni. Paquminartutut, kanngunartutut isigineqartarami. Kanngunanngilaq, Ane Marie Ottosen oqarpoq, nangillunilu:

- Inuk oqaluttuassartaqarpoq. Assigiinngitsorpassuarnik misilittagaqartarpoq. Imaassinnaasoq sumiginnagaasoq, angajoqqaavi imerajuttuusut, imaluunniit nammineq imerajuttuusoq, imaluunniit meeraanerminiit atornerlugaanikuusoq. Taakkuupput puigorneqartartut. Oqaluuserineqartarnissaat pingaaruteqarput, Ane Marie Ottosen oqarpoq.

Taassuma ujartugaa tassaavoq inuusuttut ammasut, misigissutsiminnillu toqqortuinngitsut.

- Inuusuttortavut ammartinngikkutsigit taava qaqugu ammassagatta? Taava ajornartorsiutivut qaqugu qaqilertassagatsigik? Ane Marie Ottosen aperaaq.

Upernavimmiullu inuusuttortai nuannaartuunerarpai, misigisaminnilli inunnut allanut oqaluttuarinnikkusunneq ajortut unnerpai.

- Inuit nuannaartut, kisiannili aamma misigisartoorujussuit, misigisaminnulli tunngatillugu aamma matoqqalaartut. Qiimaniarneq atortorujussuuaat, aamma qiimalluartaqaat, qiimaneriinnaanngilarli. Artorsaateqartarput. Inuttut naleqassuseq nammineq takusinnaasariaqarpaat, inuttut nammineq naleqarnertik, uangaavunga, taanna, ilaa? 23-nik ukiulik, ilinniartitsisunngorniaq, Ane Marie Ottosen oqarpoq.