Nalaatsornerinnakkut iluanaartoq
Kapilisiliummi meqqilerneqarsimasup, Tuluit Nunaanniillu Aasiannut ingerlaarsimasup, meqqia nassaarigamiuk ullumi akilerneqarpoq amerikkamiut dollariinik 1.500-junik, 8.500 koruunit missaannik naleqartunik.
Susanne P. Thorin maajimi akunnaalliliilluni inuuissiorpoq ernutaalu aamma 15-liilluni. Taamaammat nalliuttorsiornissartik sioqqullugu Pisiffimmi aalisartuniillu kapisilinnik qerisunik arlalinnik pisivoq:
- Taava uagutsinni qeritsivimmut iliorarpagut taakkua pisiakka. Aamma kingornatigut inuinnarnit pisinikuuvunga. Kisianni taamaattumik takusaqanngilanga taakkua kapisillit suliarinerini. Kisianni kingornatigut nassaarama qerititsiviup eqqangajaani aperivunga: Unaana suna? Qorsorpaluttunnguaq qilerutitaasalik, Susanne P. Thorin nuannaaqisoq oqarpoq, nangillunilu:
- Ilakka apersoluarpakka sunaanersoq. Ernutarput angajulleq uagutsinniikkami uigalu. Igiinnangajakkaluarigalu uima oqarfigivaanga: Aallanngivippoq aalisakkamut mærkeq, Susanne P. Thorin oqarpoq.
Susanne P. Thorinip meqqeq Qaasuitsup Kommuniani aalisarneq piniarnerlu pillugu fagchefiugallartumut takutippaa.
Tassanilu aatsaat paasivaa nassaarisani kapisillit meqqerigaa. Siunnersorneqariaramilu Pinngortitaleriffimmut Namminersorlutillu Oqartussanut saaffiginnippoq:
- Assileriarlugu taqqavunga nassiukkakku. Taava tassanngaanniit attaveqaqatigiinneq aallartippoq. Pissangaammertarlungalu. Taamaallunga allagarsivunga Nascominngaanniit, Susanne P. Thorin oqarpoq.
Kisianni meqqeq nassaarisani, kapisilimmut Tuluit Nunaanni 1975-imi ikkunneqarsimasoq, suminngaanneerpiarnersoq naluaa:
- Tupigusuttorujuuvunga. Maanngaanniiginnarsinnaannginnami taanna mærkeq. Tassa uatsinniippoq. Taava paasigakku kapisillip mærkerigaa, naatsorsuutigaara tassa taakkunanngaanneersimassasoq, Susanne P. Thorin oqarpoq.
