Politiit qullersaat: Nakuusertoqartarnerujussua ajornartorsiutaavoq

Bjørn Tegner Bay nunatsinni ukiuni kingullerni qulingiluani politiit qullersaraat, Inatsiseqarnermullu ministereqarfimmut isumaqatigiissuteqarnikkut atorfik ukiuni tulliuttuni tallimani tigummiinnassavaa. Politimesterip pinerluuteqartarnerit arlariit annikilliartornerat nuannaarutigaa.

Nunatsinnili nakuusernerit, toqutsinerit kinguaassiutitigullu kannguttaatsuliortarnerit annertussusaasa eqqaaneqarneranni ernumaammerpoq nipaalu ilungersuummerpalulluni. 

2017-imi nakuunerserit, toqutsinerit, toqutseriarnerit kinguaassiutinullu pinerliinerit 1280-it unnerluutigineqarput. Kisitsit taanna siusinnerusumi taama qaffasitsigisimanngilaq.

- Ullumikkut pissutsit ernumanarput. Aqqummut kukkusorluinnarmut ingerlasoqarpoq.

AAMMA ATUARUK Kinguaassiuutitigut atornerlunneqarsimasut inuunermi sinnera kingunipilutsitsisarput

Suliassarpassuit taakku politiit suliaanni initungaatsiartartut, Bjørn Tegner Bayip oqaatigaa. Toqutseriarnerimmi, pinngitsaaliinerit nakuusersimasullu eqqarsaatigiinnaraanni eqqugaasorpassuusarput.

- Inuit taama amerlatigisut inunnit allanit timimikkut annersinneqartarnerat inuiaqatigiit isaaninngaanniit ajornartorsiutaavoq.

Nakuusernerit, saassussinerit naapertuilluanngitsuliornerillu ikinnerulernissaasa qulakkeernissaat, nunatsinni politiit ukiuni tulliuttuni sulissutiginiarpaat.

- Pinaveersaartitsinermik suliaqarnerput aggustip allaqqaataaniit allanngortissavarput, tassani politiit pisortaata tullersortaa pinaveersaartitsinermi immikkoortortaqarfimmi siuttuulissaaq nunarpullu tamaat suliaqarfigalugu pinaveersaartitsinerit kisiisa akisussaaffigissavai.

AAMMA ATUARUK Ilisimatooq nakuusertarnermut iliuuseqaqqusivoq

Politiit qullersaat naapertorlugu inunnut navianartorsiortitsilluni pinerluuteqarnerit amerlanerannut pinerluttup inuuniarnermigut ajornartorsiuteqarnera pissutaasarpoq. Taamaammat politiit oqartussatattumassuseqartut tamaasa suleqatigalugit pinaveersaartitsineq sammissavaat.

- Iliuuseqarniarluta pinaveersaartitsinermik annertuumikataqatigiissaarluakkamik suliaqartariaqarpugut.

AAMMA ATUARUK Nunatsinni pinngitsaaliinerit nunarsuarmi amerlanersaasut

Inuusuttut akornanni pinerluuteqarnerit ikilisinngaatsiarnissaat ukiuni kingullerni iluatsilluarpoq. Kisitsisit taakku persuttaasarnerup siunissami annikinnerulernissaannut neriuuteqartitsipput. Taamaattoqassappalli annertuumik suliniuteqartoqartariaqarpoq.

- Inuusuttut inuuneranni ukiut 18-it 19-illu siulliit pinerluuteqarnermiitinngikkutsigit taama pinerluuteqartalinnginnissaanut periarfissagissaarneruvoq. Taamaammat neriuuteqarluarpunga, sukannersumilli suliniuteqartariaqarpugut. Politiit kisimiillutik kivissinnaanngilaat, inuiaqatigiilli tamarmiullutik suliaq kivittariaqarpaat, politiit qullersaat, Bjørn Tegner Bay oqarpoq.

AAMMA ATUARUK Aapparisamik malunnaarsaarluni atoqateqarneq pineqaatissiissutaasalissasoq