Nakuusertoqartarnera Arnat Ulluanni immikkut samminiarneqartoq
- Arnarpassuit ulluinnarni ingerlalluartumik inuuneqarput. Ilinniarsimasut aamma suliffeqarlutik atorfimminni qaffakkiartortartut amerliartorput, peqatigisaanillu ilaqutariinni ulluinnarni inuuneq inissaqartinneqarluni, naalakkersuisoq Martha Lund Olsen taama oqarpoq, nangillunilu:
- Kisianni arnat amerlavallaat persuttagaallutik atugaqartinneqarput. Tamanna ajornartorsiutaavoq Naalakkersuisut ilungersunartutut isigisaat. Arlalinnik siunnerfilinnik suliniuteqarpugut, ilaatigut persuttaasarneq akiorniarlugu iliuusissanut periusissanullu pilersaaruterput aqqutigalugu. Persuttaasartut samminerulissavagut. Angutit oqaloqatigiittartoqatigiit annertoorujussuarmik suliaqartooreerput, kisianni immikkut suliniuteqarnissaq pisariaqartinneqarpoq.
Aamma atuaruk Arnat ulluat - angutinik pingaartitsiffigalugu
Nakuusernermik eqqugaasunik aallussiviusunik neqeroorutit
Neqeroorutinik arlalinnik nakuusernermit eqqugaasunik aallussiviusunik peqareerpoq. Qeqertarsuarmi Illernit, nuna tamakkerlugu qimarnguik katsorsaaviutigisoq 2015-imi ammarneqarpoq. Illernit ukioq ataaseq tikillugu sivisussusilimmik arnanut nakuuserfigineqarsimasunut meeraannullu ilinniarsimasut sulisoralugit katsorsaanissamik tapersersuinissamillu neqerooruteqarpoq. Ilaqutariinnermut, Naligiissitaanermut Isumaginninnermullu Naalakkersuisoqarfik Kalaallit Nunaat tamakkerlugu qimarnguinnut ilaqutariinnullu sullissivinnut aamma tapersiisarpoq.
- Nunatsinni arnat ullutsinni atugaasa sammineqarnissaannut marsip ulluisa arfineq-aappaatperiarfissaalluarpoq, ilaqutariinnermut, naligiissitaanermut isumaginninnermullu naalakkersuisoq Martha Lund Olsen taama naggasiivoq.