Nakuusertarneq pillugu ataatsimeersuartoqarnerani Kunngissap nulia peqataassaaq
Tassanilu Kunngissap nulia Mary, Naalakkersuisoq Martha Lund Olsen Nunatsinnilu ilinniarsimasut arlallit peqataassasut, nutaarsiassanut nalunaarummi Mary Fonden, Danner tallimanngormat allappoq.
Angerlarsimaffimmi nakuuserseq Nunatsinni ajornartorsiutaanngaatsiarpoq. Nunatsinni arnat inersimasut 62 procentii nakuuserfigitinnikuupput, ajornartorsiulli paquminartutut suli isigineqartarpoq. Tamannalu ataatsimeersuarnikkut allanngortitseqataaffigineqarsinnaavoq.
Ataatsimeersuarneq ‘Angerlarsimaffimmi nakuusertarneq - ataatsimoorluta akisussaaffipput’ danskinit kalaallinillu suleqatigiiffiusussaq Kattunnermit aaqqissuunneqassaaq. Ataatsimeersuarnerullu ingerlanerani suliffinnit assigiinngitsunit suliaqartut ataatsimoorlutik kalaallit angerlarsimaffiini nakuusernerup ajornartorsiutaaneranut aaqqiissutaasinnaasunik nassaartorsinnaanissaat neriuutigineqarpoq.
Mary Fonden Kunngissap nulianik siulittaasuuffigineqartoq Kattunnermi ilaavoq, taamaammallu ataatsimeersuarnermi pingaarutilittut inissisimassaaq.
Kunngissap nulia ataatsimiinnerup ammarnerani oqalugiassaaq, ullaallu tungaani pisussani peqataariarluni ualikkut ataatsimiinnerup naammassinerani takkuteqqissaaq.
Mary ulluni pingasuni aggustip 29-ianit 31-ianut Nunatsinniissaq. Ataatsimeersuarnerullu saniatigut meeqqerivinnut aamma pulaassaaq, Naalakkersuisoq Martha Lund Olsen ataatsimeeqatigissavaa, Nuummilu Qimarnguik pulaassavaa kiisalu Meeqqat pillugit siunnersuisooqatigit ataatsimeeqatigissallugit.
Inuiaqatigiit nakuuserneq ungasillissavaat
Ataatsimeersuarnissami aggustip 30-iani peqataasussat ilagaat, Kommuneqarfik Sermersuumi ilaqutariinnermut pisortaq Tina Dam. Taassuma neriuutigaa ataatsimeersuarneq nakuuserup oqallisaalernissaanut aallarniisuussasoq, taamaalillunilu ukkatarineqarnerulerlunilu suliniuteqarfiulissasoq.
- Ajornartorsiut isummerfigisariaqarparput. Inuiaqatigiittut nakuusernermut naaggaarsinnaalerniassagatta peqatigiillutalu angusarissaarfiunerusumik pissusilersulerniasagatta, qanigisariinni nakuusertarnerup ilaqutariittut inuunermut, inummut meeqqamullu kingunerisartagaasa oqaasinngortinnissaat, iIlisimasalittut suliaqartuulluta akisussaaffitsinnut ilaavoq, Tina Dam tusagassiutinut alakkami issuarneqarpoq
Kattunneq ukiuni marlunni kingullerni aappariinni nakuusernermut akiuiniarnermut suliniutinik nukittorsaasimavoq, ilaatigut Nunatsinni qimarnguinni sulisut akornanni misilittakkanik paarlaaqatigiinnernik ilinniartitseqqiinikkullu.
Aapparisamit nakuuserfigitittarneq KNR-ip maajip qaammataani ukioq manna sammivaa.
Uani assigiinngitsunik atuagaqarsinnaavutit:
Randi: Persuttaasartumik ukiut arfinillit aappaqarsimavunga
Thomasip kamannini oqaluuserisinnaannginnamiuk persuttaasalerpoq
Ukiuni 27-ni persuttaanertalimmik inooqatigisaminit qimaasoq
Persuttagaasartut ilaat illoqarfimminnit qimaasariaqartartut