Nakuusernerit ilaannai ilisimaneqarput

Ukioq 2010-mi nakuusernerit unnerluutigineqartut nuna tamakkerlugu katillugit 789-iupput. taakkuali saniatigut nakuusernerit unnerluutigineqanngitsut tallimariaammik amerlanerusinnaapput, tassa katillugit 3.935-iusinnaallutik, Politi Poul Hansen naliliivoq, tassa Politiit nalunaarsuiffiat tallimariaammik ilaneqaruni.

Nakuusernerit unnerluutigineqartanngitsut amerlanerpaartaat meeqqat inuusuttuaqqallu ukioqanngitsuniit 14-it tungaannut ukiullit akornanni pisartut Nuummi politiassistentip Poul Hansenip oqaatigaa.

- Atuarfimmi atuartut akornanni nakuusernerit, qinngasaarinerit, oqaatsit atorlugit annersaanerit ullut tamaasa pisarput, taakkualu nakuusernernut unnerluutigineqartanngitsunut naatsorsuutini amerlanerpaapput, Poul Hansen oqarpoq.

Nakuusernerit unnerluutigineqareersut kingorna unnerluutiginnittunit tunuartinniarneqartartut kisitsisini ilaatinneqartut, tassaakkajunnerupput ilaqutariit akornanni nakuusernerit.

- Qatanngutigiit akornanni nakuusernerit, ikinngutigiit akornanni aaqqiagiinnginnerit angajoqqaallu meeqqaminnut nakuusertut timikkut tarnikkullu unnerluutigineqarneq ajortut ilagaat, Poul Hansen oqarpoq.

Unnerluusserusunnginnermut tunngatillugu illuatungeriit akunnerminni nammineq aaqqiinissaq ilaatigut tunngavilersuutigisarpaat. Pisinnaatitaaffinnilli ilisimasakippallaarneq unnerluussisannginnermut aamma patsisaasorineqarpoq.

- Eqqoriarsinnaavara unnerluutiginnissinnaanermut pisinnaatitaaffik meeqqanit ilisimaneqarpianngitsoq, Poul Hansen oqarpoq.

Nakuusernerit ukiuni 2006-imiit 2010 ilanngullugu katillugit 4.061-iupput, ukiut tamaasa nakuusernerit unnerluutigineqartut 800 missaaniittarlutik.

Nakuusernerilli unnerluutigineqartanngitsut tallimariaammik amerlanerusinnaapput, ukiullu tallimat ingerlanerini nakuusernerit unnerluutigineqanngitsut ilanngukkaanni katillugit 20.305-innaallutik.

Inuttussuserlu aallaavigissagaanni Tasiilami nakuusertarnerit amerlanerpaapput. Paamiut, Narsaq, Aasiaat, Ilulissat, Sisimiut aamma Nuuk nakuuserfiunerpaanut aamma ilaapput.

Nakuuserneq pillugu eqqartuussivinni suliat akiliisitsinermik kinguneqarsinnaapput, aammali innarliinerup sakkortussussia aallaavigalugu pillaatissiinermik pineqaatissiisoqarsinnaalluni.