Nakuuserneq akiorniarlugu akerliussutsimik takutitsisoqassaaq

Aasinaasiit - nakuuserneq peqqutaalluni Nunatsinni arnaq toquvoq! Arnat suleqatigiit, 8. marts gruppemik imminnut taagortut, Nuummi aqagu ualikkut sisamaniit ingerlaaqatigiissitsinissaminnut aggersaanertik taama aallartippaat.
Allattoq Elisa Isaksen
juunip 09-at 2010 05:25

Taamatut ingerlaaqatigiinnissamut pissutaavoq, arnaq 54-inik ukiulik Nuummi arfininngornerup sapaatillu unnuaani toqutaammat. Paasissutissiissutigineqartut najoqqutaralugit, arnap angummit inooqatigisaminit unatarneqarnini toqqutigaa.

8. marts gruppemit oqaatigineqarpoq, ajoraluartumik tamanna takornartaanngitsoq, tassami arnarpassuit taamatut atugaqarmata.

Tamanna akueriinnarneqassanngilaq! Angutit naameersinnaatitaapput, arnat naameersinnaatitaapput, meeqqat naameersinnaatitaapput! Nakuuserneq akuerineqarsinnaanngilaq! 8. marts gruppemiit kajumissaarumminni ilaatigut taama allapput.

Ingerlaaqatigiinneq Nuummi aqagu ualikkut sisamaniit Katuap silataaniit aallartissaaq.

Tamatumunnga peqatigitillugu 8. marts gruppemit inuit sinerissamiittut illoqarfimminni nakuuserneq akiorniarlugu ingerlaaqatigeeqqullugit kajumissaarneqarput.