NAKUUSA meeqqanik inuusuttunillu qinersinermut atatillugu aaqqissuussisoq
Meeqqat inuusuttullu politikerinik naapeqateqarnissaat NAKUUSA-mit KNR-imillu aaqqissuunneqarpoq. Meeqqat inuusuttullu partiit siulittaasuinut oqallinnermi assigiinngitsunik tassani apeqquteqarsinnaapput.
Naalagaaffiit Peqatigiit Meeqqat pillugit Aalajangersagaanni oqariartuutit ilaatigut ukkuusut: 'Meeqqat isummersorsinnaatitaaneq pisinnaatitaaffigaat' aamma ' Meeqqat qanoq isumaqarnertik annisissallugu pisinnaatitaaffigaat', ualeru sisamanut toqqaannartumik TV-kkut aallakaatitsinermi sammineqarnerpaassaaq.
- Meeqqat pisinnaatitaaffiisa oqallisigisaqattaartuarnissaat pisariaqarpoq, NAKUUSA-mi aaqqissuusseqataasoq Arnavaraq Jørgensen oqarpoq imalu nangilluni.
Meeqqat pisinnaatitaaffii sammineqassapput
- Meeqqat pisinnaatitaaffimminnik ilisimaarinnittut pisinnaatitaaffitik innarlerneqartillugit ikioqqunissaminnik noqqaanissartik ajornannginnerutittaraat ilisimavarput, Arnavaraq Jørgensen oqarpoq.
Ualimut oqallinissamut atatillugu Nunatsinni atuarfiit tamarmik peqquneqarsimapput, meeqqat atuartut apeqqutigisinnaasaannik ilusilersueqqullugit. NAKUUSA-miillu oqaatigineqarpoq isiginnaartussat tamanna qilanaarissagaat, tassami meeqqat atuartut assigiinngitsorpassuarnik apeqqutinik pitsaasunik nassiussisimammata.
Nuummi meeqqat inuusuttullu piumasut ilinniarnertuunngorniarfiup inersuaanut tusarnaariarnissaat NAKUUSA-mit kissaatigineqarpoq.
Oqallinneq KNR-TV-kkut toqqaannartumik ualimut nalunaaqutaq sisamanut aallartissaaq, tallimallu tungaannut ingerlassalluni. Aallakaatitsineq toqqaannartumik aamma nutserneqassaaq tamannalu KNR-2-kkut tusarnaarneqarsinnaassalluni.
