NAKUUSA atuartitsissutinik nutaanik saqqummersitsisoq
NAKUUSA-p atuartitsissutinik saqqummersitai ilaatigut sungiusaatinik ”Toqqissisimalersitsineq” aamma
”Majuartafiit ammut qummullu” imaqarput.
Ilinniartitsisut atuartuutitik ilagalugit sungiusaatissaannik quppersagaliaqarpoq, tamatumalu saniatigut allamik aamma meeqqanut sullitaqartut allat ilinniartitsisullu atorsinnaasaannik sungiusaatinik quppersagaliaqarluni.
Sulisunut quppersagaliap siunertarivaa ilinniartitsisut meeqqat pisinnaatitaaffiinik tunngassuteqartunik ilinniartitsinerminni pitsaanerusunik atortussaannik tunniussassaqarnissaq.
Pinnguarsinnaanermut, ilinniartitaanermut allanullu pisinnaatitaaffiit
- Ilaatigut Meeqqat Pisinnaatitaaffiisa imarisai qanoq paasineqarnissaat taamalu qanoq saqqummiunneqarnissaasa nalornissutigineqartarneri naammattoortuartarparput – aamma meeqqanut inuusuttunullu sullitaqartuni tamanna naammattoorneqartarpoq.
- Ilaasa nunani sorsuffiusuni atugarliortunilu meeqqat pisinnaatitaaffii atuutsinneqarnerutinniartarpaat. Kisiannili suliarpassuarni, meeqqat atuarfiini paaqqinnittarfinnilu suliassarineqartut, meeqqanut pisinnaatitaaffiit atuutsinneqarnissaat qulakkeerinniffiusussaapput, soorlu pinnguarsinnaanermut, ilinniartitaanermut allanullu pisinnaatitaaffiit, NAKUUSA-mi ingerlatsisoq, Arnavaraq Jørgensen, tusagassiorfinnut nalunaaruteqarluni taama allappoq.
NAKUUSA-p meeqqat pisinnaatitaaffiinik ilisimalersitsiniarnini ukiuni tulliuttuni suli sakkortunerulersinniarpaa, tassani atuarfiit kommunillu suleqatigalugit suliniut ”Uagut ulluinnarput, uagut niperput” ukiamit aallartinneqassalluni.