VIDEO NAKUUSA appippoq: Inersimasut akulerullusi!
Meeqqammi inuusuttullu pisinnaatitaaffiinik ukiuni kingullerni aallussinerujussuaq paatsoorfiulersinnaasimammata paasititsiniaasoqarnissaa Nakuusap pisariaqarsoraa:
- Meeqqat, angajoqqaat ilinniartitsisullu naapittarnerisigut meeqqat meeqqat pisinnaatitaaffiinik paatsuungassuteqartartoq paasisarparput. Assersuutigalugu meeqqat pisinnaatitaaffii imatut paasineqassanerpat meeqqat namminneq aalajangiisartussaatitaasut?, Nakuusami suliniutinik ataqatigiissaarisoq Najaaraq Møller tusagassiuutinut nalunaarummi ilaatigut aperivoq.
Inersimasut meeqqanut inuusuttuaqqanullu asannittumik akuliuttarnissaat Nakuusap suliniutaani kaammattuutigineqarpoq, meeqqallu inersimasullu meeqqat kissaataat pisinnaatitaaffiisalu assigiinngissutaat paasititsiniutigineqarniarlutik.
- Tassunga atatillugu suliniuteqarpugut angajoqqaat meeqqaminnut asannittumik akuliuttarnissaannik kaammattuisumik, taakkuugamimmi meeraalluarnissamut sinaakkusiisussat. Uagullu inersimasut meeqqanut inuusuttuaqqanullu meeqqat pisinnaatitaaffii kissaatillu assigiinngissutaasa suunerinik oqaluttuartartussaalluta, Najaaraq Møller oqarpoq.
Sullinniakkat suliamut matumani akuutinneqarput, assersuutigalugu ilinniartitsisut paasititsiniummut siunnersueqataanermikkut ilaasorujussuutinneqarlutik.
Paasititsiniut "Kinami oqass'? Uagut oqass'!" KNR-TV-kkut, radiokkut, allagartarsuartigut mappersagaaqqakkullu qaammatip massuma ingerlanerani maluginiarneqarsinnaajumaarpoq, ukiamullu atuarfiusoq aallartippat atuarfeqarfiit atuartitsissutissanik angajoqqaallu oqaloqatigiinnissamut pinnguaatinik nassiussorfigineqarumaarlutik.
