- Paatsuungasoqarpasittarpoq, ingammik maani Narsami nakorsat allanngorartorujussuungamik. Kingullermik nakorsiarama aatsaallu nassuiaaqqittariaqarlunga, ullut qassit qaangiummata nakorsiaqqikkama nakorsaq allanngoreersimasoq, Oline M. Gabrielsen oqarpoq.Assi: Privatfoto

Qulaarpaa Nakorsat taarseraannerat napparsimasunut nalornisitsinerulerpoq

Nakorsat peqqissaasullu nunatsinni napparsimmavinni piffissami sivikitsumi atorfeqartarnerat taarseraannerujussuallu, napparsimasunut nalorninartorsiortitsisarput. Peqqinnissaqarfimmilu paarlatsinik atuinerujussuaq napparsimasut isumagineqarnissaannut kinguneqartoq, Nunatsinni nakorsaaneq isumaqarpoq.

- Ukiut 23-it anniaatigereerlugu sullinneqarnera qiviassagukku iliuuseqarfigineqarsimanngilanga. Sullinneqarnera naammaginanngilaq, taama oqaatigisariaavoq massakkumut inissisimanera eqqarsaatigissagukku.

Oline M. Gabrielsen Narsameersoq taama oqaluttuarpoq.

Taanna inuunini  tamangajaat siffiamigut akornuteqarsimavoq, taamatullu peqqinnissaqarfimmi sulisut taarseraannerat qanimut misigisaqarfigilluarsimallugu.

- Paatsuungasoqarpasittarpoq, ingammik maani Narsami nakorsat allanngorartorujussuungamik. Kingullermik nakorsiarama aatsaallu nassuiaaqqittariaqarlunga, ullut qassit qaangiummata nakorsiaqqikkama nakorsaq allanngoreersimasoq. Nakorsiarfiga siulleq paasinnilluareernikoq, taava nakorsaq allanngormat aamma nassuiaaqqikkama soorunami aamma isumai taassumap allaapput, Oline M. Gabrielsen oqarpoq.

52-iusuni 21-iinnaat

Peqqinnissaqarfiup iluani immikkoortortat tallimaasut KNR-ip sianeqattaarfigineratigut paasinarsivoq, nakorsani 52-iusuni 21-iinnaat aalajangersimasumik atorfeqartuusut. Atorfiit sinneri nakorsanit piffissami sivikitsumi atorfeqartussanit matussuserneqarsimapput, ilaatigut sapaatit akunnerinik marlunnik sivisussuseqartinneqartunik.

Nunatsinni nakorsaaneq, Henrik Trykker, Nunatsinni peqqinnissaqarfimmik nakkutilliisuuvoq. Taannalu isumaqarpoq nunatsinni nakorsat aalajangersimasumik atorfeqartut napparsimasut isumagineqarnissaannut pingaaruteqarluinnartuusut.

- Napparsimasut peqqissarneqarnissaannut pingaaruteqarput, aamma napparsimasut nalorninnginnissaannut pingaaruteqarput. Suliat nalorninanngillat, kisiannili suliat arriinnerusumik ingerlapput, Henrik Trykker oqarpoq.

Oline M. Gabrielsenip misigisimasaatut, nakorsat paarlaanneranni napparsimasut pillugit paasissutissanik pingaaruteqartunik annaasaqarsinnaaneq ajornartorsiutaasoq, Henrik Trykker oqaluttuarpoq.

 

Napparsimasut isumagineqarnerat ulorianartorsiortoq

Ajornartorsiulli napparsimasut inuunerannik naleqarsinnaasorineqanngilaq.

- Naamik, taamaassorinngilara. Soorunami napparsimasut isumagineqarnerat ulorianartorsiorpoq, tamannali ima paasineqassaaq napparsimasup isumagineqarnera kigaannerulersoq, Henrik Trykker oqarpoq.

Nakorsat taarserartuarneri Oline M. Gabrielsenimut qasunarsimaqaaq.

- Soorunami nukillaajallannartarpoq ukiut taamannak nakorsiaqattaartareernikuulluni aamma nassuiaasseqattaarneq qamuuna qasunartarpoq. Aatsaallooqqittutut, sorsuutigisaq aatsaallu aamma qaqileqqillugu. Soorunami nukillaanganartarpoq uannut, Oline M. Gabrielsen taama oqarpoq.

Peqqinnissaqarfimmi nakorsat peqqissaasullu paarlakaanneranut aaqqiissutissat pillugit, suliamut attuumassuteqartut politikerillu sisamanngorpat Qulaarpaami oqallissapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat