Nakorsat qullersaasa Maniitsumi allannguineq taperserpaa
Ernisarfiup matuneqavinissaanik oqalunneq paatsoornermik kinguneqarsimasoq, Nunatsinni nakorsat pisortarigallagaata, Kent Kleinschmidtip oqaatigaa, pisorlu eqqarsaatigalugu, Qeqqata nakorsaanerata, Ove Rosing Olsenip iliuuserisimasai isornartoqartillugit.
- Tusaratsigu Maniitsup peqqissaaviani ernisarfik matusussaq aammalu sulisut arlallit tamatuminnga naammagittaalliuteqarnerminnik ersersitsinerisa kingorna, oqarpugut tamanna matusinerigallaannarnerusoq.
Kent Kleinschmidt paasitinneqarsimanerarpoq, Maniitsup ernisarfia, ukiup naanissaata tungaanut taamaallaat matugallaannassasoq.
- Soormi aallaqqaammulli oqaannarsimanngilasi ernisarfik matugallaannarneqarniartoq?
- Uagut nalunaarfigineqarnerput tunngavigalugu qanoq iliuuseqatussaavugut. Oqartoqarsimappat matugallassasoq, taava tamanna nalunaarutigalugu oqassaagut. Kisianni ajoraluartumik Ove Rosing Olsenip uagullu akornitsinni paatsortoqarsimassaaq, tamatumalu kingorna isummat assigiinngitsut aporaassimapput. Oqqatigissavarali, Ove Rosing Olsen uagut tugitsinnit inissinneqanngimmat.
Kent Kleinschmidtip inissitsisoqannginneranik oqarami pivaa, Qeqqata nakorsaanera, Ove Rosing Olsen qullersaqarfimmit inissinneqarsimanngitsoq.
Ernisarfimmi sulisussanik pisariaqartinneqartunik, tassa erninerup nalaani ajutoortoqassagaluarpat napparsimmavimmiittussanik, atorfinitsitsinissap tungaanut Maniitsumi ernisarfik matugallarneqaannartoq, Kent Kleinschmidt oqaatigaa.
- Ulluni qaninnerni allagarsiivugut inuit atorfissaqartinneqartut pissarsiariniarlugit. Tamannalu pisarnertut pisaaq, tassa atorfissarsiuinermi periutsit atorneqassallutik, Kent Kleinschmidt oqarpoq.
- Ernisarfimmi sulisut atorfissaqartinneqartut Maniitsumi atorfeqarnissaat suleqatikkalu pingaartipparput anguniarlugulu. Tusarparput, nakorsaq maajip aallaqqaataani tikittussaasoq, aammali alla nakorsaq ernisussiortartoq tikittussaavoq, taannali aallaqattaarluni tikeqattaartussaavoq, taannali Danmarkimi nakorsiartitsisartuinnaq sulinerusimagami, nakorsamik allamik suleqarteqarnissani pingaartissimagaa tusarlutigu.
Maniitsup peqqissaaviani ernisarfiup matuneqarnissaanik nalunaarnerup kingorna Maniitsumi innuttaasut sulisullu tamanna naammagittaalliutigaat, tamannalu ersersinneqarluni Maniitsumi innuttaasut 350-it missaanniittut akerliussutsimik takutitsimmata.
- Maniitsumi innuttaasut naatsorsuutigilersinnaavaat ernisarfiup siunissami ammaannarnissaa?
- Tamanna akiuminaappoq. Ullumikkulli tunngaviusut aallaavigalugit takuinnarsinnaavarput pilersaaruteqartoqanngitsoq, tassa Qeqqata nakorsaqarfia eqqarsaatigalugu pilersaaruteqartoqanngilaq ulluliinermik taasilluni, tamannali suleqatikkalu pilersaarusiortariaqassavarput ulluliilluta naliliisarlutalu, nunatsinni nakorsat qullersaattut atorfeqarallartoq, Kent Kleinschmidt oqarpoq.
Ulluliinerli ataaseq ilisimaneqartoq tassaavoq, Maniitsup peqqissaaviani ernisarfik maajip aallaqqaataani matugallartussaammat, aatsaallu januaarip aallaqqaataani ammaqqinneqassalluni.