Nakorsat Peqatigiiffiat tupigusuppoq
Peqqissutsimut Naalakkersuisoqarfiup kukkunersiuisuisa oqarnerattut eqqumiitsunik siumoortunik akissarsititsisoqartarsimavoq, Peqqinnissaqarfimmilu qullersat ingerlaannartumik suliunnaarallartinneqarlutik. Peqqissaaveqarfinni nakorsat pisortaat nutaat tallimat siumoortumik akissarsitinneqarsimasunut ilaapput.
Taamatulli akissarsititsisoqartarsimanerata Naalakkersuisoqarfimmit mamiatsaatigineqarnera Kalaallit Nunaanni Nakorsat Peqatigiiffiata paasisinnaanngilaa, tassami Peqqissutsimut Naalakkersuisoqarfik nakorsanik atorfinitsitsinermut suleqataammat.
- Nakorsat, peqqissaaveqarfinni pisortanngortussat, akissarsiassaat pillugit Kalaallit Nunaanni nakorsat Peqatigiiffiata Peqqissutsimullu naalakkersuisoqarfiup akornanni 2010-mili ukiakkut isumaqatigiinniartoqarpoq. Isumaqatigiissullu taamanikkut naammassineqangajalluinarpoq, atsiorneqarnissaa kisimi amigaataalluni. Aningaasallu siumoortumik tunniunneqarsimasut nakorsat pisortassaasa akissarsiassaannut naapertuupput, Kalaallit Nunaanni Nakorsat Peqatigiiffianni siulittaasunngorlaaq Ole Lind oqarpoq.
Akissarsiat pillugit siorna 2011-mi isumaqatigiinniartoqartussaanera pissutigigunarlugu akissarsiat pillugit isumaqatigiissummik Peqqissutsimut Naalakkersuisoqarfiup atsiornissani utaqqissuppaa.
Ole Lindilli oqaatigaa, siumoortumik akissarsititsisoqartarnera Peqqissutsimut Naalakkersuisoqarfiup ilisimaarilluaraa:
- Akissarsiat pillugit isumaqatigiinniarnerni taakkunani, suli naammassineqanngitsuni, Namminersorlutik Oqartussat isumaqatigiinniartartui Peqqissutsimullu naalakkersuisoqarfimmeersut isumaqatigiinniarfigaavut, nakorsallu Peqqissaaveqarfinnilu pisortaannut akissarsiaritinneqartut qanoq amerlatiginersut, isumaqatigiinniarfigisatta nalunngilaat, Ole Lind oqarpoq, nangillunilu:
- Taamaammat tupigusuutigaarput, aningaasat taama amerlatigisut tunniunneqarsimanerat tupigusuutigimmassuk, Ole Lind oqarpoq.
Ole Lind aamma isumaqarpoq, naleqqutinngitsuusoq paasiuminaallunilu, nammineq suarsummik taarusutaminik peqquteqartumik, peqqinnissamut qullersat soraarsinneqariaannaammata:
- Suarsoorpasippoq. Peqqissaaveqarfinni nakorsat pisortaasa akissarsiassaat pillugit isumaqatigiissutigineqartussat allanngungaarnissaat takorlooruminaatsippara. Siornami 2011-mi apriilimi isumaqatigiinniarnitsinni taamannak ilisimatinneqanngilagut, Ole Lind oqarpoq.
Peqqissutsimut Naalakkersuisoqarfiup pisortaata Ann Birkekær Kjeldsenip tusagassiutinut nalunaarummi apriilip sisamaani oqaatigaa suliaq suli misissuiffigineqartoq, inatsisilerituullu suli nalililersuimmata, suliaq suli naammassineqarsinnaanngitsoq.
Ann Birkekær Kjeldsen oqaaseqarumanngilaq. Peqqissutsimut naalakkersuisoq Agathe Fontain oqaaseqartinniaraluaratsigu aamma iluatsinngilarput.
