Nakorsat peqatigiiffiat: Ajorluinnartumik kinguneqarsinnaavoq

Peqqinnissaqarfimmi Aqutsisoqatigiit suliunnaarallarsinneqartut allanit taarserneqassappata, tamanna Peqqinnissaqarfimmut kingunipiluttussaassasoq, Nakorsat Peqatigiiffiannit oqaatigineqarpoq.
apriilip 12-at 2012 10:51

Peqqissutsimut Naalakkersuisoqarfimmi pisortap, Ann Birkekær Kjeldsenip isumakuluut tamanna paasisinnaanerarpaa, Peqqinnissaqarfiulli allanngortiternerani taartaagallartut sulisullu allanngortiterineq eqqarsaatigalugu tamatumunnga ilisimasaqarluarmata suliap ingerlaqqinnissaa ernumanartoqartinngilaa.

- Peqqinnissaqarfimmi qullersat taarserneqassappata, tamanna ukiup affaa imaluunniit ukioq ilivitsoq qaangiuppaat aatsaat pisinnaassasoq naatsorsuutigineqarsinnaavoq. Taartaasussat pissutsit qanoq innerinut paasitinneqaqqaassapput, tamannalu Peqqinnissaqarfiup iluamik ingerlannissaanut pinngitsoorani kingunipiluttussaassaaq, Nakorsat Peqatigiiffiani siulittaasoq, Ole Lind taama oqarpoq.

Taassuma ilanngullugu oqaatigaa, Peqqinnissaqarfiup allanngortitileruttorneranni pisortat pikkorissut aatsaat taama atorfissaqartinneqartigisut.

- Sinerissatsinni napparsimmaveqarfiit ikilisarneqarneri pitsanngorsarneqarnerilu maanna aallarteerpoq, tamannalu oqittuinnaanngilaq. Kalaallit Nunaanni Peqqinnissaqarfik nunanut allanut naleqqiullugu allaaneroqaaq, taamaattumillu Peqqinnissaqarfiup allanngortiterneqarneranut, maanna suliunnaarsitaasunut taartaasussanik pikkorissunik imaaliallaannaq atorfinitsitsisoqarsinnaanani, Ole Lind oqarpoq, taanna Dronning Ingridip Napparsimmavissuani ulluinnarni nakorsaanertut atorfeqarpoq.

Nakorsat Peqatigiiffiata eqqasuuteqarnera paasisinnaalluarlugu, Peqqissutsimut Naalakkersuisoqarfimmi pisortap, Ann Birkekær Kjeldsenip oqaatigaa.

- Aamma uanga tamanna eqqasuutigaara, pisortaagallartullu suliap qanoq inneranik oqaloqatigiuarlugit. Peqqinnissaqarfiup allanngortiternerani taartaagallartut uangalu neriuutigaarput, sulisunit tapersersorneqarluarnissarput, taamaalilluta suliaq isumaqatigiissutigalugu pitsaasumik naammassisinnaassagatsigu, Ann Birkekær Kjeldsen oqarpoq. Taassumalu Peqqinnissaqarfinni sulisut suliamut naammassinnissinnaakutsoortut oqaatigaa.

- Misigisimavunga Peqqinnissaqarfiup allanngortitsernera ingerlalluartoq aammalu napparsimmavinni sulisut pikkorissut akisussaassuseqartullu Peqqinnissaqarfiup ilorraap tungaanut aallartinnissaanut sulerusussuseqartuusut misigisimallunga, Ann Birkekær Kjeldsen oqarpoq.

Peqqissutsimut Naalakkersuisoqarfimmit suli maannamut ilisimaneqanngilaq, aqutsisut suliunnaarsinneqarallartut qaqugu suliffimminnut utersinnaanissaat.

Peqqissutsimut Naalakkersuisoqarfimmi pisortap isumalluarnera Ole Lindimit taperserneqanngilaq, taannami isumaqarpoq aqutsisut suliunnaarallarsitallu piaarnerpaamik sulisinneqaleqqittariaqartut.

- Sinerissami napparsimmaveqarfiit ikilisarneqarneranni takusinnaasarput naapertorlugu qullersaasimasut sulilluartorujussuupput. Taamaattumik taakku sulileqqinnissaat pingaaruteqarpoq, sulileqqinngippatami suliaq unittuuvittussaassaaq, Nakorsat Peqatigiiffiani siulittaasoq, Ole Lind taama oqarpoq.

Peqqinnissaqarfimmi Qullersatut taartaagallarput, Aqutsisoqarfimmi pisortaagallartoq Henrik Overvad, Nakorsaanerit qullersaagallagaat Kent Kleinschmidt aamma Peqqissaasunut pisortaanerugallartoq Ella Skifte.