Nakorsat paarlattaasartussanut ingerlatsivimmik aallartitsinialerput

Nakorsat Efa Olsen aamma Peter Nzulumike nunatsinni peqqinnissamik suliaqartunut napparsimmavinni kommuninilu sulisunut paarlattaasartussanut ingerlatsivimmik pilersitsinialeruttorput. Tamatuma kinguneranik Peqqinnissaq Pillugu Kattuffiit atorfinnut mattussiniarlutik ullumi sioorasaaripput, taakkumi akissarsiat atorfeqarnermilu atugassarititaasut pillugit isumaqatigiissuteqarniarlutik isumaqatigiinniaraluarnerat iluatsinngitsoormat. Maannali illuatungeriit naapeqqinniarlutik isumaqatigiissuteqarput.
oktobarip 14-at 2008 17:14

Efa Olsen paarlattaasartunut ingerlatsiviliariniagartik pillugu ima oqarpoq:

- Peqqissaasunut arlalinnut ingammillu nakorsanut arlalinnut, maani atorfinissinnaanngitsunut, attaveqarfeqareerpugut. Attaveqaativullu Kalaallit Nunaanni pissutsinut naleqqussassavavut, sapinngisamillu nukinginnartunut paarlattaasoqarsinnaassaaq, Efa Olsen oqarpoq.

Paarlattaasartunik ingerlatsivik pilersaarutit naapertorlugit Kalaallit Nunaat tamakkerlugu ingerlatsissaaq, nakorsallu marluk aallartitsiniartut peqqinnissamik suliaqartut pisortaqarfiannik Nuummilu kommunimi oqartussanik oqaloqatiginnereersimapput, sulili akissuteqarfigineqaratik, Efa Olsen oqarpoq.

Peqqinnissaq Pillugu Kattuffiit atorfineqqusiunnaarniarlutik sioorasaarereersullu paarlattaasartunik aallartitsiniartut PPK-mut saaffiginnipput ataatsimeeqatigiinnissarlu isumaqatigissutigineqarluni.

- Paarlattaasartussat soorunami ajunngitsumik atugassaqartikkusuppavut. Taamaalillutik PPK-p ilaasortaanit ajornerusumik atugassaqartitaannginniassammata. Pitsaanerusumik neqerooruteqarsinnaanissarput anguniarparput, taamaalillutami piginnaaneqarluartunik paarlattaasinnaasunik pissarsisinnaaniassagatta.

- Ilisimavarput napparsimmavinni sulisuusimasunik arlaatigut peqquteqarlutik suliunnaarsimasunik peqarmat, taakku soorlu utoqqaat illuini napparsimmavinniluunniit sulilerseqqissinnaanissaat neriuutigaarput. Taamatut ilinniagaqarsimasut allani sulilersimagaluartut paarlattaasartunik sulisoqarnitsigut sulilerseqqissinnaaniassagatsigik, nakorsaq Efa Olsen oqarpoq.

Suliffeqarfik nakorsat marluk, nakorsatut sulinermik saniatigut ingerlanniagaat taaguuteqassaaq ‘Vikarbureau for Grønlandsk Sundhedspersonale’. Manna tikillugu danskit paarlattaasartunut suliffeqarfiutaat ‘Active Care’ ukiorpassuarni nunatsinnik sullissisuuvoq.