Nakorsat nutserisussaarutilernertik aalassassimaarutigaat

Nunasisut tamarmik, ukiut sisamat sinnerlugit Danmarkimeereersimagunik, nakorsiarniarunik, nutserisumillu pisariaqartitsillutik, aappaagu juunip ulluisa aallaqqaataanniit namminneq akilertalissavaat. Kalaallinut qallunaatut tamakkiisumik oqalussinnaanngitsunut tamanna ilaatigut eqquisinnaavoq.

- Assersuutigalugu taasinnaavarput kalaaleq ukiut 30-t sinnerlugit Danmarkimi najugaqareersoq. Tutsarluttuuvoq, taamaammat qallunaatut oqalussinnaanani paasisinnaananilunniit. Eqqortumik nakorsaasersorneqanngikkuni, tamanna toqqutigisinnaavaa. Taamaallaallu nutserisoqarluni paasisinnaavoq, nakorsaatimimi qanoq atornissaat nutserisup nassuiaaneratigut taamaallaat paasisinnaavaa, nakorsaaneq, nunasisut Odensemi Universitetshospitalimi nakorsiartarfianni ulluinnarni pisortaasoq, Morten Sodemann, atuagassiamut Ugeskrift for Læger-mut, oqarpoq.

Peqqinnissamut ministerip, Bertel Haarderip, oqarnera naapertorlugu, Danmarkimut nunasisut nutaat tamarmik qallunaatut oqalunnermik ilinniarnissaat pimoorunneqarmat taama inatsisiliortoqarpoq.

Inatsisit nutaat Nakorsat Kattuffiannit naammagittaalliutigineqareerput. Ungasianit nutserisoqarneq sumiiffinni arlalinni taarsiullugu atorneqalereerpoq, tassa nakorsat nakorsiartullu nutserisumut pikkorissumut videokkut attavilerneqartarput, nutserisorlu taamaalilluni nutserisinnaasarluni.