Nakorsat allattaat perngaammik Kalaallit Nunaanni naapeqatigiissapput
Nunani avannarlerni, tassalu Norgemit, Sverigemit, Savalimmiunit, Islandimit, Finlandimit, Danmarkimit kiisalu Kalaallit Nunaannit peqataaffigineqartumik, nakorsaat allattaasa ukiut pingasukkaartumik naapeqatigiittarnerat, qulissaanillu ingerlanneqartussaq, Qaqortumi pernaammik ingerlanneqassaaq. Nakorsaat allattaasa sulerisarnerat tusarfigitsiaqqaarallartigu.
- Nakorsat allattaat assigiinngitsunik suliaqartarput, nakorsiartoqarsimatillugu, nakorsarlu oqalulluni oqaasertalioraangat, tassa dikteriigaangat, taakku allattarpavut, taakkumi immiunneqartarput, taava aamma specialisteqaraangat taakku allattarpavut. Taakku immikkut ilisimasallit Danmarkiminngaaniit aamma Kalaallit Nunaanniit napparsimmavitsinnut sineriamminngaaniit angalaartarput.
Nakorsat allattaat pisariaqartinneqartuaannarput, uagoqanngikkuttami journalit kia allassavai?
Ellen Faurschou, Ilulissani nakorsat allattaat, ataatsimeersuarnissamuttaaq aaqqissueqataasoq taama nassuiaavoq.
Taama naapeqatigiittarneq nukittorsaataasartoq, Taavannguaq Fleischer, Sisimiuni nakorsamut allatsi, ataatsimeersuarnissamillu aamma aaqqissueqataasoq oqarpoq.
-Taama naapeqatigiittarneq immitsinnut nukittorsaqatigiinnissatsinnut uagullu atukkavut pillugit tapersersoqatigiinnissatsinnut atortarpavut. Ersinngitsutut uagut ittaratta, taamaattorli allaffissornikkut qitiusorujussuulluta,
Nakorsamut allatsitut ukiuni 30-nngortuni sulisoq, ataatsimeersuarnermillu aaqqissuusseqataasoq, Sisimiuneersoq Taavannguaq Fleischer taama oqarpoq.
Nunani avannarlerni nakorsat allattaasa ataatsimeersuarnerat aggustip ulluisa 26-anniit 28-at ilanngullugu Qaqortumi Sulisartut Højskolianni ingerlanneqassaaq. Peqataasuniillu 60-it missarpiaannittunit aqqaneq-marluk sinerissamit peqataassapput.
