Nakorsat allattaasa atorfillit Kattuffiat isumalluarfigaat

Kalaallit Nunaanni nakorsat allattaat 28-it SIK-mit anillutik Atorfillit Kattuffiannut ilaasortanngorneri, SIK-mi siulittaasup, Jess G. Berthelsenip puffaallaatiga.
septembarip 26-at 2011 16:08

Nakorsat allattaasa kattuffimmut allamut nuunneri, Jess G. Berthlsenip kusanaatsuliornertut taavaa. Atorfillit Kattuffiat aamma isoralugu, nakorsat allattaat ilaasortarilersimammagit, naak isumaqatigiinniutarneri suli SIK-mit tigummineqaraluartoq.

SIK-p siulittaasuata assuarinninnera Atorfillit Kattuffiata siulittaasuata, Erik Hammekenip eqqissiivilluni tiguaa, taassumalu naqissuserpaa, nakorsat allattaannik nammineq ilaasortassarsiorsimannginnami.

- Namminneruku ilaasortanngorusuttut. Qinnuteqaataat qinnuteqartaasartut allat assigalugit suliaraagut, Erik Hammeken oqarpoq nangillunilu:

- Ilaasortanngorusuttut ataasiakkaarlutik tamarmik piumasaqaativut mailikkut telefax-ikkullu akuersaarpaat. Aamma akuersaarpaat qaammammut akiliutaasartoq 375-it koruuniusoq. Aatsaallu nakorsat allattaat akuersaareermata, Atorfillit Kattuffianni siulersuisuunerit ataatsimiikkamik ilaasortanngornissaat akueraat, tassami taakkua AK-mi isumaqatigiinniuttakkatsinnut assingusuupput, Erik Hammeken oqarpoq.

Tassalu SIK-mi ilaasortaasimaneq maannalu AK-mi ilaasortaalerneq malunnartumik assigiinngillat.
Jess G. Berthelsenip oqarnera naapertorlugu, nakorsat allattaat pingasuinnaat SIK-mut tamakkiisumik akiliisarlutik ilaasortaapput. Taamaakkaluartoq Jess G. Berthelsenip taakku kattufimmut allamut ilaasortanngorneri tupaatigaa.

- Isumaqatigiinniarnernut kingullermut namminneq peqataapput. Akissarsiaat atorfinitsinneqarnermilu atukkatigut, SIK-mi ilaasortanit allanit agguaqatigiissitsinermi pitsaanerusumik angusaqarlutik. Aamma aappaagumut isumaqatigiinniarnissanut pitsaanermik angusaqarusullutik uagutsinnut saaffiginninngillat, naak isumaqatigiinniarneq tulleq aappaagu aprilip aallaqqaataani pisussaagaluartoq, Jess G. Berthlesen oqarpoq.

Taanna aamma oqarpoq, nakorsat allataasa isumaqatiginiuttarneri SIK-mit suli tigummineqartoq.

Taamali oqarnera Atorfillit Kattuffiannit eqqissisimasumik tiguneqarpoq.

Sulisitsisunut - tassalu Namminersorlutik Oqartussanut, Kattuffiit tunngaviusumik  isumaqatigiissuteqarmata, Atorfillit Kattuffiat annilaangassutissaqanngilaq.

- Misilittakkat takutippaat, uppernarsarsinnaagutsigu, isumqatigiinniunneqartartut affaat uagut kattuffitsinniilerpata, isumaqatigiinniussisussaaneq uagut tigussagipput, aamma uani taamaappoq, isumaqatigiinniunneqartussat ilinniarsimasut 100 procentii ilaasortarileratsigit, Erik Hammeken naqissusiivoq.

Taassuma ilanngullugu eqqaasitsissutigaa, tunngaviusumik inatsit naapertorlugu kikkulluunnniit kattussuussinnaatitaammata, aammalu kattuffinnut aalajangersimasumut ilaasortaasusaanermut inuit pisinnaatitaaffii pillugit eqqartuussivik naaggaarnikuummat. Tassalu ilaasortaaffeqanngitsut kattuffimmut aalajangersimasumut pinngitsaalillugit ilaasortanngortinneqarsinnaanngillat.

- Tassalu pisoq una pillugu Namminersorlutik Oqartussanut maanna saaffiginnissaagut, taamaalioreeruttalu ingerlariaqqikkumaarpugut, AK-p siulittaasua, Erik Hammeken oqarpoq.

Jess G. Berthelsenip ullumi oqaatigaa, nakorsat allattaat allamut nuunnissaminnik kissaateqarpata tamatumunnga akerliuniarniarani.

Nakorsat allattaasa Atorfillit Kattuffiannut ilaasortanngorniarnerminni neriuutigaat, ingerlaannartumik angusinnaassallugu sulisunut ataatsimoorussamik sillimmasiissutit, napparsimalernermut sillimmasissut aammalu qaammammut 6.000-it koruunit angullugit akissarsiami qaffannissaat, nakorsat allattaat qallunaat akissarsiaaattut akissarsiaqalerlutilk.

Atorfillit Kattuffiatali siulittaasua, Erik Hammeken piumasaqaatinut taakkununnga tunngasumik oqaaseqarusunngilaq, oqarluni isumaqatigiinniarnerit sioqqullugit piumasaqaatitik nalunaarutigineq ajoritik.