Nakorsat aamma kukkusarput

Danmarkimi nakorsat napparsimmavinni sulisut namminersortullu ima ulapitsigaat, kukkusumik siorna pilatassarinngisaminnik allaat pilattaasarsimallutik kukkusunillu nakorsaasersuisarsimallutik. Pilatsittut inuit 30-it kukkusumik suliarineqarsimapput.

Taama allappoq aviisi Danmarkimi ullormut saqqummersartoq,. B.T.

Peqqinnissaqarfimmit kisitsisit naapertorlugit suliaritittussat allat 68-it kukkusumik suliaritingajavissimapput, tamannali qujanartumik paasijaarneqarmat, suliaritittussat eqqortumik suliarineqarsimapput.

- Tarrarsuinermi assit killormut saatillugit isiginnaartoorsinnaasarpavut. Napparsimasut uninngasut aqqi assigiipajaarpata ilaatigut paarlaattoorsinnaasarpavut. Qangaanerusoq piffissaqarnerusutut ittarpugut, ullutsinnili ulapilernikooqaagut, immikkoortortaqarfimmi nakorsaq, Jørgen Hansen, oqarpoq. Nangipporlu:

- Assersuutigisinnaavarput una: Napparsimasut ulloq siulleq unikkunik, ullup tulliani suliaritissapput, immaqalu aqaguani angerlareersinnaallutik.

Ajornartorsiut Napparsimasut Peqatigiiffiannit ilisimaarineqarpoq, kukkusumillu suliaritissimasunut, soorlu tallliminnik nissuminnilluunniit ajoquteqanngitsunik peersitsisimasunut, siunnersuutissaqarput:

- Napparsimmavimmut unikkiartulerussi tushimik nassartaritsi. Suliaritinnginnermi nukillaangavallaanngikkaanni nukissaqarluarlunilu sukkut pilatsissanerluni nakorsaq aperineqarsinnaalluarpoq. Nakorsap pilatassani nammineq nalunaaqutsinngippagu, nammineq taamaalioritsi, Peqatigiiffimmi siulittaasoq Karsten Skawbo-Jensen, nassuiaavoq.