Nakorsat aamma ernumapput

Napparsimmavissuup pilattaaviani nakorsaaneq Ole Lind oqarpoq.

- Upernaarli pilattartittussat maanngartussaagaluit killilersorneqalerput qaammallu kingulleq uniusavillutik, kinguartinneqarsinnaanngivissut kisimik tigooqqarneqartaleramik, Ole Lind nassuiaavoq.

Peqqissaasut ernumanerattulli nakorsat napparsimmavissuup matusariaqalernissaa ernumassutigineraat aperigatsinni, Nakorsat peqatigiiffianni siulittaasup tullia ima oqarpoq.

- Aap, taama oqartariaqarpunga. Missingersuutit malillugit ingerlatsiniassagutta allatut ajornassaqaaq. Maannakkorpiaq misigisimavunga sullorsuartut ittup ingerlavigisatta isuani qaamaneqanngivissoq. Immaralannguarluunniit qaamaneqarsimasuuppat ajornavianngikkaluarpoq, kisianni taamaattoqanngilaq.

- Ukioq nutaaq aallartippat aningaasassaqaqqilersimassaagut, kisianni sulisussaqassanerpugut? Sulisut nunaqavissut atorfeqavissullu maani sulineq artornarpallaaqimmat soraarsimasut inuulluaqqoriikkagut maannamut ikinngeqaat. Ilimaginngilara ukiortaami aningaasassaqaqqilerutta utissasut, taamaammat aap, Dronning Ingridip Napparsimmavia sulisussaarutiveriaannaavoq. Imaassinnaavoq aamma peqqissaasut nakorsallu Danmarkimut nunanulluunniit avannarlernut nuuttut, tappakkumi aamma sulisussaaleqeqaat. Aamma imaassinnaavoq illoqarfimmiiginnarniarunik allamik suliffissarsiortut, Ole Lind oqarpoq.

Dronning Ingridip Napparsimmaviani peqqissaasunik taartaasartunik nalinginnaasumik atorfeqartitsinermut naleqqiullugu marloriaammik akilertakkanik tikisitsinissamik unitsitsigallarneq pillugu uninngasut siniffii 19-inik qaammatini kingullerni ikilileriffigineqarput, siniffiit pilattaavimmi 13-it nalinginnaasullu arfinillit ukiortaap tungaanut sipaarneqarlutik.