Nakorsaq qaratsamigut innarlersimasoq Nunatsinni sulisimavoq
Tarnip nappaataanut nakorsap napparsimasunik kukkusumik katsorsaasarneranik arlalinnik mianersoqquneqareeraluarlutik sulitiinnarsimavaat.
Maannakkulli paasineqarpoq nakorsaq qaratsamigut innarlernikoq Kalaallit Nunaanni aamma sulisimasoq.
Aaja Chemnits Larsenip §37 apeqqut tunngavigalugu apeqquteqaataanut Naalakkersuisup Martha Lund Olsenip akissuteqaammini allappaa.
- Uppernarsarneqassaaq tarnip pissusaanik ilisimasalik pineqartoq dronning ingridip napparsimavissuani atorfeqarsimammat, psykiatrisk afdelingi-mi katillugit sapaatit akunneri qulingiluani 2005-mimi 2006-milu sulisimavoq, Martha Lund Olsen allappoq.
DR-p nittartagaani atuarneqarsinnaavoq nakorsaq 2002-mi biilinik ajutoorneermi kingorna qaratsamigut innarlersimasoq.
Nunatsinni napparsimaveqarfiup ileqqoraa atorfinitsitsinnginnerup siorna nakorsat sulisinnaanermik akuerisaanersut misissornissaat, suliffiusimasuniilli oqaaseqaatinik pissarsinissaq.
Kisiannili tarnip nakorsaata akuersissutaa peqqissutsimut aqutsiveqarfiup aatsaat 2013-mi arsaarinnissutigaa, taamaattumik atorfinitsinneqarmat sulisinnaannginnera ilisimaneqarani.
Nakorsaq toqusoqarneranut annertuumillu kukkusumik katsorsaanernut attuumassuteqartoq Danmarkimi saqqummersinneqarpoq.
Martha Lund Olsenilu malillugu nunatsini kukkusumik katsorsaasimaneranik ilisimasaqanngillat.
- Nakorsaaneqarfik Peqqinnissaqarfilluunniit tarnip pissusaanik ilisimasalimmit pineqartumit katsorsarneqarsimasunit naammagittaallliortunit ilisimasaqanngillat. Aamma pineqartumit tunngatillugu nakkutilliinissamut suliakkiisoqarsimanngilaq taarseeqqusinermilluunniit piumasaqaateqartoqarsimanani. Taassuma atorfeqarnermini nappaatinik kukkusumik suussusersisimaneranik imaluunniit kukkusumik katsorsaasimaneranik peqqinnissaqarfimmi aqutsisunit aamma ilisimasaqanngillat, Martha Lund Olsen allappoq.
Nakorsaq vikarbureau aqqutigalugu atorfinitsinneqarsimavoq periuserlu taanna qimanneqarnissaa peqqinnissaqarfimmit sulissutigineqarpoq.
Suliamut tunngasumut peqqinnissamut ministerip Nick Hækkeruppip peqqinnissamut aqutsiveqarfimmi pisortaq Else Schmidt sisamanngormat atuutilersumik soraarsippaa.
