Nakorsaq: Nakorsiat tatiginninnerat innarlerneqartarpoq

Nakorsat paarlakaannerujussuisa kingunerannik nakorsiat nakorsanut tatiginninnerat innarlerneqartartoq, sulisunullu aalajangersimasunut piffissarujussuaq ilitsersuinermut atorneqartariaqartartoq, Eskild Boeskov Ilulissani nakorsaaneq oqarpoq.

Nakorsat Ilulissani arfiniliusussaapput, ullumikkulli nakorsaq aalajangersimasumik atorfilik ataasiinnaavoq. Nakorsanut atorfiit pingasut qaammammit ukiup affaa tikillugu taartaasunit paarlakaajaattunit ulloq manna tikillugu inuttaqartinneqarput.

Eskild Boeskov, ukiuni arfinilinni Ilulissani nakorsaanermini ukiut siulliit pingasut missaanni ataasiinnarmik aalajangersimasumik suleqateqarsimasoq oqarpoq:

- Soorunami nakorsap nakorsiallu akornanni tatigeqatigiinneq innarlerneqartarpoq. Nakorsiammi pinerit tamaasa suna nakorsiutiginerlugu aallaqqaataaniit nakorsamut nutaamut oqaluttuarisariaqartarpaa, Eskild Boeskov nassuiaavoq.

Taamatuttaaq nakorsat taarseraattarnerat nakorsiartumut artukkiisartoq isumaqarpoq.

- Nakorsaq ilikkaruttorlugu aallartarpoq, tamannalu soorunami nakorsiartumut artukkiisarpoq, nakorsarlu aallaraangat ingerlateqqitassaagaluit ingerlateqqinngitsoorsinnaanerat annilaanngatissaajuaannarpoq, imaassinnaavoq misissugassatut tigusat suliareqqinneqanngitsoortut, Eskild Boeskov oqarpoq.

Taamaattumik sulisut akornanni taarseraattoqartuartillugu ulluinnarni suliariaatsip attannissaa ajornakusoortuusoq Eskild Boeskov aamma isumaqarpoq.

Sinerissami nakorsat atorfii 41-pput, taakkunannga 17-it kisimik atorfeqavissunit inuttaqarput.