Nittartakkatigut maalaarutinik siammarterisoqarneranik tunngaviusumik kukkusoqaratarsinnaasoq, nakorsaq Peter Vencken isumaqarpoq.

Nakorsaq: Facebookikkut naammagittaalliuutit paasissutissanik amigarajupput

Peqqinnissaqarfimmi sulisut pillugit nittartakkatigut attaveqaqatigiittarfinni naammagittaalliortarnerit iluaqutaanngillat siunissamilu taama kukkusoqaqqinnissaanut pinaveersaartitsisinnaanatik. Suliallu illuatungersuinnarnerusumik imaluunniit toqqaannartumik eqqunngitsumik saqqummersinneqartartut, nakorsaq isumaqarpoq.

Suliat nalinginnaasumik marlunnik sammiveqartuusarput, taakku tamarmiutillugit innuttaasut peqqinnissaqarfik pillugu Facebookikkut naammagittaalliuleraangata saqqummersinneqarneq ajorput. Taamaammat politikerit peqqinnissaqarfimmilu sulisut naammagittaalliornerit taamaattut unitsinniarpaat.

- Isornartorsiuineq ajornartorsiutaanngilaq. Facebookikkulli saqqummersinneqartartut amerlanertigut sulianut ataasiakkaanut tunngasuusarput, taamaammat oqaloqatigiissutiginnikkusukkaluarluta oqaaseqarsinnaasanngilagut, Narsami nunap immikkoortuani nakorsaq, Peter Vencken oqarpoq.

Saqqummersitani taakkunani peqqinnissaqarfimmi sulisut sulianut ataasiakkaanut oqaaseqarsinnaannginnerat pissutigalugu paasissutissat tunngaviusut amerlanertigut amigaasaasartut inuillu Facebookikkut saqqummersinneqartunik isorinnittumik isiginnittartut erseqqissaatigaa.

- Naammaginanngitsumik sullinneqarnermik ajornerusumilluunniit nalaassisoqarsimanera paasisinnaasarparput, saqqummersinneqartulli amerlanertigut ataasiinnarmik sammiveqartarput, tassami Facebookikkut saqqummersinneqartut paasissutissiiffigalugit oqaaseqarsinnaannginnatta, Peter Vencken oqarpoq.

Ileqqorinnerusumik naammagittaalliornissamut periarfissaq arlariittut

Naalakkersuisunit kisitsisit naapertorlugit peqqinnissaqarfimmit kiffartuussinermut naammagittaalliutit 2018-imi 76-iupput, taakkunannga 16-it naammagittaalliuteqarnerminnik isumaqatigineqanngikkunik ilaatigut isumaqatigineqarput. Ukioq taanna nakorsaanermut naammagittaalliortoqarneranut suliat passunneqarsimanermut naammagittaalliutertaqartut 95-iupput

AAMMA ATUARUK Politikeri: Torersumik oqallitsiarta

Peter Venckenip Facebookikkut naammagittaalliutinut atatillugu kukkunerit qanoq avaqqunneqarsinnaanersut innuttaasunullu qanoq pitsaanerpaamik kiffartuussisoqarsinnaanera pillugu torersumik oqaloqatigiissuteqartoqarnissaa amigaatigaa.

Naammagittaalliutigineqartartut assigiinngitsut marluupput. 

Passunneqarsimaneq pillugu naammagittaalliuutit: Misissortinneq, nappaatip suuneranik paasisaqarneq nappaammullu katsorsartinneq, erninermi ikiorteqarneq, paaqqutarinninneq, napparsimasunut ataasiakkaannut tunngatillugu pinaveersaartitsineq peqqissaaneq, suliaritinnissamut paasissutissinneqarneq akuersissuteqarnerlu, Nappaatipnalunaarsornera, peqqinnissaqarfimmi sulisut nipangiussisussaatitaanerat, nakorsamit allagartaliussat.

 

Sullinneqarneq pillugu naammagittaalliutit peqqinnissaqarfiup kiffartuussineranik ukuninnga ilaqarpoq: Sulisut pissusilersornerat, ininut tunngasut, nakorsiartarfiup ammasarfii aamma utaqqisarnerup sivisussusaa

- Innuttaasunut oqaloqatigiissuteqarnissarput kissaatigaarput aamma peqqinnissaqarfiit qanoq pitsanngorsarsinnaanerivut pillugu oqaloqatigiissuteqarusuppugut, nakorsaq oqarpoq.

Taamaammat nittartakkatigut attaveqaqatigiittarfitsigut saqqummersitsisoqaraangat tamanna aamma iliuuseqarfigineqartarpoq. Allaatigisamik allattoq amerlanertigut attavigineqartarpoq, suliarlu pisimasoq pillugu ataatsimeeqatigiinnissamut inunnik aggersaasoqartarluni.

Napparsimasunut pitsaanerpaamik iliuuseqarusuttut

Peter Venckenilli illuatungeriinni paaseqatigiittoqarnissaa tunngaviusumik amigaatigaa, tamattami assigiimmik piumasaqarpugut.

- Kiffartuussilluarnissatsinnut sapinngisatsinnik iliuuseqartugut innuttaasunit soorunami paasineqassaaq. Innuttaasunik ilorrisimaanngittoqarnissaa kissaatiginngilarput, ilaatigulli killiliisariaqartarpugut.

Peter Venckenip innuttaasut napparsimasut peqatigiiffiinut ilaanissaat aamma Facebookikkut saqqummersitsinatik peqqinnissaqarfimmut oqaloqatiginnittarnissaat kaammattuutigaa.

Napparsimasut peqatigiiffiisa allattorsimaffiat peqqik.gl-imi nassaarineqarsinnaavoq, aalajangersimasumilli sammiveqanngitsumik suli peqatigiiffeqanngilaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat